Berdibek Saparbaev Tarazdaǵy mektepterdiń qurylys barysyn jeke baqylaýynda ustaýda
TARAZ. QazAqparat – Jambyl oblysynyń ákimi Berdibek Saparbaev Taraz qalasyn kezekti ret aralap, bilim berý nysandarynyń qurylysymen tanysty,- dep habarlaıdy QazAqparat tilshisi oblys ákimdiginiń resmı saıtyna silteme jasap.
№ 4 orta mekteptiń jańa ǵımaratynyń qurylysyn merdiger jyl sońyna deıin aıaqtaýdy maqsat etip otyr. Jospar boıynsha nysan aǵymdaǵy oqý jylynyń úshinshi toqsanynda tapsyrylýy kerek. Jańa ǵımarat 180 oqýshyǵa arnalýda. Mektepte qazir 166 bala bilim alady desek, bastaýysh synyp oqýshylary ýaqytsha jaqyn mańdaǵy № 33 mektepte oqýda.
1944 jyly irgesi qalanǵan № 16 D.Karbyshev atyndaǵy orta mekteptiń bas ǵımaratynyń ornynda 348 oryndyq jańa ǵımarat boı kóterýde.
«Jańa ǵımarat kelesi jyly daıyn bolady. Qarasha aıynyń sońynda úsh korpýstyń biriniń aǵymdaǵy jóndeý jumystary aıaqtalady», - deıdi mektep dırektory Janna Ońǵarbaeva.
Kezekshi synyptar 2008 jyly salynǵan qosymsha ǵımaratta bilim alýda.
Á.Bókeıhanov atyndaǵy №1 gımnazııaǵa japsarlas salynyp jatqan qosymsha ǵımarattyń qurylysy aıaqtalýǵa jaqyn. Jańa ǵımaratta 12 synyp jáne eki mýltımedııalyq kabınet qamtylǵan. Bir aýysymda 300 oqýshysy oqı alatyn alady.
Merdiger uıym óz esebinen mekteptiń negizgi ǵımaratynyń aldyńǵy kireberisi men qasbetin jóndep, oǵan irgeles aýmaqty asfalttaǵan.
Berdibek Saparbaev qurylys basqarmasyna merdigerlerdiń sapaly materıaldardy paıdalanýyn jáne jergilikti óndirýshilerdi qoldaýdy qamtamasyz etýdi tapsyrdy.
Aımaq basshysy №2 jáne №22 mektepterdiń qurylys qarqynyna kóńili tolmady. Oblys ákimi kelisimshartta kórsetilgen mindetterin buzyp, kesteden aýytqyǵan jaýapsyz merdigerlerdiń jumysyn synǵa aldy.
«Kelisimshartqa qol qoımas buryn, usaq-túıekke deıingi barlyq jaıtty oılastyrý kerek edińiz. Al endi mardymsyz syltaý aıtýdyń ne keregi bar? Aýqymdy qarajat bólingenimen, ony tıimdi ıgerý isi kóńil kóńshitpeıdi. Eger bıyl osy mindetti utymdy sheshe almasańyz, onda kelesi jyly sizge mundaı jaýapty sharýa senip tapsyrylmaıdy», - dep eskertti Berdibek Saparbaev.
Ol qurylys alańdaryndaǵy jumysshylar sanyn kóbeıtýdi, jyl sońyna deıin №22 mektep ǵımaratynyń qabyrǵalary men shatyryn turǵyzýdy talap etti. Qala ákimi Aıtqazy Qarabalaevqa nysandarǵa kún saıyn baryp, tekserip, kemshilikterdi ýaqytyly joıyp otyrýdy tapsyrdy.
Sondaı-aq, Berdibek Saparbaev ekinshi toqsanda qosymsha taǵy da kezekshi synyptardy ashý máselesin kóterdi.
«Mektepter balalardy qabyldaýǵa daıyn bolýy kerek», - dedi ol bilim basqarmasynyń basshysy Gúlnar Hodjabergenovaǵa qarata.
