Berdibek Saparbaev Tarazdaǵy dárihanalar men sýpermarketterdi tekserdi
TARAZ. QazAqparat – Jeksenbi kúni Jambyl oblysynyń ákimi Berdibek Saparbaev Taraz qalasyndaǵy birqatar iri saýda oryndary men dárihanalardy tekserdi, dep habarlaıdy QazAqparat oblys ákiminiń baspasóz qyzmetine silteme jasap.
Berdibek Saparbaev aldymen Taraz qalasyndaǵy sýpermarketterdegi áleýmettik mańyzy bar azyq-túlik baǵalaryn tekserdi. Atap aıtqanda, ol «Korzınka», «Firkan» jáne «Mart Magnat»saýda jelileriniń dúkenderinde boldy.
Óńir basshysy tutynýshylarmen kezdesip, azyq-túliktiń jetkilikti deńgeıde qamtylý barysyna, usynylyp otyrǵan taýarlardyń túrlerine, onyń ishinde jergilikti óndiristiń úlesine aıryqsha kóńil bóldi. Oblystyq kásipkerlik jáne ındýstrıaldy-ınnovatsııalyq damytý basqarmasyna atalǵan máseleni baqylaýda ustaý, azyq-túlik taýarlarynyń qala bazarlaryna úzdiksiz jetkizilip otyrýyn qadaǵalaýdy tapsyrdy.
Óz kezeginde saýda oryndarynyń ákimshilikteri búgingi kúni sóreler azyq-túlikke toly ekendigin, dúrligý men uzyn-sonar kezektiń baıqalmaıtynyn atap ótti. Monıtorıng tobynyń málimetterine súıensek, áleýmettik mańyzy bar taýarlardyń baǵasy turaqty, degenmen qant pen kartop baǵasynyń shamaly qymbattaǵany anyqtalǵan.
Sondaı-aq, oblys ákimi oblystyń turaqtandyrý qorynyń azyq-túlik taýarlary saqtalatyn «Atyǵaeva» jeke kásipkerliginiń qoımalarynda at basyn burdy.
«Taraz» ÁKK basqarma tóraǵasy Núrken Shárbıevtiń aıtýynsha, Jambyl oblysynyń turaqtandyrý qorynda 2 974 tonna birinshi surypty un, 63 tonna kúrish, 54 tonna qaraqumyq, 18 tonna ósimdik maıy, 537 tonna kartop, 563 tonna pııaz, 193 tonna sábiz, 2 644 tonna qant saqtaýly. Atalǵan qordyń ónimderi 11 saýda núktelerinde jáne qalanyń 8 áleýmettik pavılondarynda tómendetilgen baǵamen satylady.
Alaıda, aımaq basshysy N.Sharbıevtiń baıandamasyna qanaǵattanbaı, shynaıy jaǵdaıdyń basqasha ekendigine, keıbir áleýmettik mańyzǵa ıe azyq-túlik baǵasynyń ósýine qatysty faktilerdiń rasynda joq emestigin alǵa tartty. Berdibek Saparbaev ÁKK basshysyna turaqtandyrý qorynyń azyq-túligi satylatyn barlyq áleýmettik dúkenderdiń jumysyna arnaıy ózi baryp, baqylaý júrgizýdi tapsyrdy.
Sonymen qatar, bul kúni oblys ákimi qalanyń birneshe dárihanasyna bardy. Dárihanalarda dezınfektsııalaý quraldary men medıtsınalyq maskalar bar, alaıda olardyń quny negizsiz joǵarylaǵany belgili bolyp otyr.
Berdibek Saparbaev Jambyl oblysynyń aýmaǵynda medıtsınalyq buıymdar shyǵaratyn kásiporyn jumys isteıtinin, onyń qýattylyǵy óńirdi medıtsınalyq maskalarymen tolyq qamtamasyz etýge múmkindigi jetetinin atap ótti. Osy oraıda oblys basshylyǵy baǵanyń alypsatarlyq negizde ósýine jol bermeý boıynsha qatań sharalar qabyldanatynyn jetkizdi.
