Berdibek Saparbaev Tarazdaǵy aýla abattandyrý jumysyn synǵa aldy
Bıyl Taraz qalasyndaǵy 163 aýlany abattandyrýǵa 2,3 mıllıard teńge bólingen. Aımaq basshysy atap ótkendeı, bul oraıda bıýdjet qarajatyn utymdy uqsatý asa mańyzdy.
Berdibek Saparbaev aldymen Áıteke bı kóshesindegi №30 kópqabatty úıdiń aýlasyndaǵy abattandyrý jumystarynyń sapasyn tekserdi. Quny 13,6 mıllıon teńgeni quraıtyn bul jumystardy merdiger «ERK-Astana» júrgizýde. Búginde turǵyndardyń ózderi kútip-baptaýǵa belsene den qoıyp, gúl men kóshet otyrǵyzyp, aýmaqty kórkeıtýge barynsha atsalysýda.
Kópqabatty úıdiń tóraıymy Madına Atajanova seriktestik dırektory Elnara Shıleevke jáne onyń jumysshylaryna atqarylǵan jumystary úshin alǵys bildirdi. Aımaq basshysy Taraz qalasynyń ákimi Aıtqazy Qarabalaevqa aýla aryqtary arqyly sý jetkizý máselesin sheship, jergilikti turǵyndardyń kógaldandyrý isine kómektesýdi tapsyrdy.
«Úı turǵyndarynyń óz aýlasyn abattandyrýǵa, kóshet otyrǵyzyp, gúlzarǵa kútim jasaýǵa degen yntasy qýantady. Tarazdyń barlyq aýlasy osy sııaqty ádemi bolýy kerek», - dedi aımaq basshysy.
Budan keıin B.Saparbaev Jeltoqsan jáne Dýlatı kósheleriniń qıylysyndaǵy sýarmaly aryq júıesin qaıta qurý jumystarynyń barysymen tanysty. Munda 36 shaqyrymdy quraıtyn aryq qalpyna keltiriledi. Búginge deıin tek 8,5 shaqyrymy jóndelgen. Berdibek Saparbaev sylbyr júrgizilip jatqan jumystar úshin jatqan merdiger kompanııany synǵa aldy.
Aımaq basshysy Jaılaý shaǵyn aýdanyndaǵy № 1,3,4,6,7 úılerdiń aýlalaryn qalpyna keltirý jáne jóndeý jumystaryn da nazarǵa aldy. Bólshektelgen jıektastardyń sapasyna aıryqsha kóńil bóldi.
«Qandaı merdiger jumys jasaýda? Sizder jaramsyz dep tapqan jıektastar áli 10 jylǵa jaraıtyndyǵyna kúmánim joq. Olardyń bárin aýystyrýdyń keregi qansha? Áleýmettik jelilerde óz narazylyǵyn bildirgen turǵyndardyń shaǵymy oryndy. Buǵan ketken aqshany balalar men sport alańdaryn abattandyrýǵa jumsaǵan abzal. Oblys ákiminiń mindeti – qarajat taýyp, bólý. Al oryndalatyn jumystardyń sapasy, tıimdiligi men merzimine tikeleı baqylaý júrgizý qala ákiminiń mindeti. Aıtqazy Dáýletqululy, muny jeke baqylaýǵa alyńyz, osyndaı negizsiz áreketterdi toqtatý kerek. Jumysqa jaýapsyzdyqpen qaraýǵa bolmaıdy»,- oblys ákimi Qarabalaevqa júgindi.
Qala basshysy aıtylǵan eskertýler boıynsha eshqandaı túsinikteme bere almady.
Óńir basshysy energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaevqa jaqynda oblys ortalyǵynyń turǵyndary shaǵymdanǵan jıektastardy aýystyrý jáne aýlalardaǵy aǵashtardy kesý boıynsha júrgizilip jatqan jumystardyń qanshalyqty oryndy ekenine taldaý júrgizý boıynsha tapsyrma júktedi.
«Báıterek» shaǵynaýdanyndaǵy № 13, 14, 15 kópqabatty úılerdiń aýlalary da qarqyndy abattandyrylýda. «Alımansýr» JShS dırektorynyń orynbasary Mámbet Saǵynbekovtiń aıtýynsha, 25 mamyrda bastalǵan jumys 10 tamyzǵa deıin aıaqtalmaq.
«Munda abattandyrý 2017 jyly júrgizilgen. Munda da sol, sapaly jıektastar aýystyrylýda. Munyń ne qajeti bar? Onyń ornyna joldardy sapaly jóndegen durys», - dedi oblys ákimi eskertý jasap.
Óńir basshysynyń aıtýynsha, aýlalardy abattandyrý kezinde merdigerler jibergen kemshilikter osyǵan jol bergen qala ákimdigi basshylyǵynyń salǵyrttyǵy men nemquraılyǵynan oryn alǵan. Bólingen bıýdjet qarajatyna tıisti baqylaý bolsa, tıimdilik arta túser edi.
