Berdibek Saparbaev Taraz qalasyndaǵy birqatar nysandardy aralady
TARAZ. QazAqparat – Jambyl oblysynyń ákimi Berdibek Saparbaev Taraz qalasyn aralap, kásipkerlik sýbektileriniń qyzmetimen, abattandyrý jumystary jáne jekelegen bilim berý nysandarynyń jaı-kúıimen tanysty, dep habarlaıdy QazAqparat Jambyl oblysy ákimdiginiń resmı saıtyna silteme jasap.
Berdibek Saparbaev aldymen Álıma Sadyqovanyń «Asyl-Aı» tigin sheberhanasyna bardy.
Óńir basshysy atalmysh sheberhanada daıyndalatyn mektep formasynyń sapasynyń joǵarylyǵy men qunynyń tıimdiligin oń baǵalady. Kásiporyn aınalym qarajatyn tolyqtyrý jáne óndiristik ǵımarattardyń tapshylyǵy máselesin bastan keshýde. Sonymen qatar A. Sadyqova koronavırýstyq ınfektsııaǵa qarsy kúreske óz úlesin qosýda. Ol eki myńnan astam maska tigip, az qamtylǵan otbasylarǵa taratqan. Medıtsınalyq halattar tigý isi de ulǵaıtylǵan.
Berdibek Saparbaev Taraz qalasynyń ákimi Aıtqazy Qarabalaevqa atalǵan kásiporynnyń damýyna barynsha qoldaý kórsetý boıynsha birqatar tapsyrmalar júktedi.
Oblys ortalyǵyndaǵy Tuńǵysh Prezıdent saıabaǵy, dálirek aıtqanda, ondaǵy jergilikti toǵan jáne oıyn alańy abattandyrýdy qajet etedi. Oblys ákimi qala ákimdigine saıabaqta kógaldar, órnektastar tóseý jáne balalardyń bos ýaqytyn tıimdi uıymdastyrý úshin onda aýla klýbyn ashý aıasynda jumystar júrgizýdi tapsyrdy.
Sondaı-aq, aımaq basshysy Qonaev, Jansúgirov jáne Seıfýllın kósheleriniń qıylysyndaǵy saıabaqty aralaý barysynda da osyndaı talaptarǵa nazar aýdartty. Jaıaý júrginshiler joldary men jaıly oryndyqtar ornatý, jaryqtandyrý jáne kógaldandyrý máselelerin ýaqyt sozbaı sheshý kerektigin basa aıtty.
Aımaq basshysy at basyn burǵan kelesi nysan – «Zerbulaq» kóliniń mańynda ornalasqan №20 mektep boldy. Mektepke deıingi shaǵyn ortalyqtyń jabylýyna baılanysty «Dara» qoǵamdyq qory osy oqý ornynda damýynda erekshelikteri bar balalarǵa arnalǵan psıhologııalyq-pedagogıkalyq ońaltý kabınetterin ashý týraly usynysyn jetkizdi. Oǵan 150-ge jýyq bala keledi dep kózdelýde.
Berdibek Saparbaev oqý ǵımaratyn jóndeý jáne irgedegi aýmaqty abattandyrý boıynsha birqatar eskertýler jasap, mektep basshylyǵyn mundaı jumystarǵa kómek kórsetý úshin túlekterdi tartýǵa, ata-analar komıtetiniń jumysyn kúsheıtýge shaqyrdy. Bul jóndeý jumystaryn júrgizý úshin bıýdjetten qoldaý bolatynyn joqqa shyǵarmady, alaıda ol úshin tek qajetti qujattardy ázirleý qajet.
