Berdibek Saparbaev Taraz qalasyn abattandyrý jumystarymen tanysty

TARAZ. QazAqparat – Jambyl oblysynyń ákimi Berdibek Saparbaev jumys saparymen Taraz qalasyn aralap, saıabaqtar men skverlerdiń, demalys oryndarynyń jaı-kúıine qanyqty. Ákim oblys ortalyǵyn abattandyrý boıynsha josparly jobalarǵa nazar aýdardy, dep habarlaıdy QazAqparat oblys ákiminiń baspasóz qyzmetine silteme jasap.

Aldymen óńir basshysy «Jas túlek» skverin abattandyrý jumystarymen tanysty. Bul maqsatqa qalalyq bıýdjetten 20 mıllıon teńge bólingen. Munda aldaǵy ýaqytta qaıta jańǵyrtýdan soń «Densaýlyq» saıabaǵy qurylmaq. Berdibek Saparbaev qala ákimdigine oblystyq densaýlyq saqtaý basqarmasymen birlesip jasyl jelekterdi otyrǵyzý, jaryqtandyrý, qoǵamdyq dárethanalardy jaılastyrý jáne jalpy qala turǵyndarynyń demalýyna barynsha qolaıly jaǵdaı jasaý boıynsha naqty tapsyrmalar júktedi.

Aımaq basshysy «Zerbulaq» demalys aımaǵyna da arnaıy bardy. Bul kóldiń tarazdyqtar kóptep jınalatyn birden-bir demalys orny bolýǵa múmkinshiligi jetedi. Degenmen, ol úshin aldymen túbin tazalap, jaǵalaýyn nyǵaıtyp, oryndyqtar men qoqys jáshikterin ornatý qajet. Oǵan ınvestorlar men tájirıbeli mamandardy tartý - mańyzdy mindet.

Sondaı-aq, bıyl «Maı» toǵaıyn qaıta jańartý jumystaryn bastaý josparlanyp otyr. Aımaq basshysy saıabaq aýmaǵyndaǵy múgedektigi bar azamattardy ońaltýmen jáne jumysqa ornalastyrýmen aınalysatyn, kúndizgi statsıonarly «Asar» qoǵamdyq birlestiginiń ǵımaratyna atbasyn burdy. Mekeme basshysy Rýslan Tólegenovtiń aıtýynsha, mekemede búgingi tańda 37 adam, onyń ishinde 30 múgedek eńbek etýde.

«Biz mindetti túrde sizderge jaıly orynǵa kóshýge jáne ornyǵýǵa kómektesemiz. Mekemeniń múgedektigi bar adamdarǵa kórsetiletin ońaltý baǵytyndaǵy qyzmetterin keńeıtý qajet», - dep atap ótti oblys ákimi.

Sonymen qatar salt attylar klýbynyń jumysy, ıppoterapııa seanstary jalǵasyn tabady. Budan bólek, psıhonevrologııalyq jáne tirek-qımyl qozǵalysynda aqaýy bar naýqastardy ońaltý úshin tıisti jaǵdaı jasalady.