Berdibek Saparbaev Taraz qalasy ákiminiń jumysyn synǵa aldy
TARAZ. QazAqparat – Oblys ákimi Berdibek Saparbaev Taraz qalasynyń aktıvimen kezdesti. Kezdesýge máslıhat depýtattary, ulttyq palata, qoǵamdyq birlestikter men quqyq qorǵaý organdarynyń ókilderi qatysty, dep habarlaıdy QazAqparat oblys ákimdiginiń resmı saıtyna silteme jasap.
Basqosýda Taraz qalasynyń ákimi Aıtqazy Qarabalaev oblys ortalyǵy turǵyndarynyń barlyq qoljetimdi baılanys arnalary, sonyń ishinde áleýmettik jeliler arqyly túsken habarlamalarynda eskertilgen kóptegen kemshilikterge qatysty jaýap berýge májbúr boldy.
Qala turǵyndary qalalyq qyzmetter men tikeleı Taraz ákimdiginiń jumysyna baılanysty 16 myńnan astam ótinish joldaǵan. Áleýmettik jelilerde Berdibek Saparbaevtyń atyna qalalyq ákimdiktiń qyzmetine qatysty 178 ótinish kelip tússe, onyń 33-i ǵana oryndalǵan. Turǵyndardy negizinen qoǵamdyq kólik jumysynyń nasharlyǵy, avtobýs aıaldamalarynyń jaı-kúıi, jol jamylǵysy, qoqystyń, ashyq lıýkterdiń kóptigi, aǵashtardy zańsyz kesý jáne taǵy basqa da túıtkildi máseleler tolǵandyrýda.
- Qalalyqtar ózderin tolǵandyrǵan jaıttarǵa oraı oblystyq ákimdikke qońyraý shalyp, áleýmettik jeliler arqyly dabyl qaǵýda. Sebebi uıymdastyrý jumystary álsiz, tıisti baqylaý joq, - dedi aımaq basshysy.
Jolaýshylar kóliginiń turaqsyz qozǵalysy, eski jáne tar avtobýstardyń las jáne yńǵaısyz salondary, júrgizýshiler men kondýktorlardyń mádenıetsizdigi qala turǵyndarynyń kópten beri kóterip kele jatqan basty máseleleriniń biri.
- Taraz qalasy ákimine adamdardyń qajettilikterin eskere otyryp, marshrýttardy júıelendirý, jańa, syıymdy avtobýstar satyp alý máselesin sheshý, elektrondy bılettendirý men GPS-baqylaýdy engizý boıynsha tapsyrmalar júktelgen bolatyn. Ókinishke oraı, áli kúnge birde-bir tapsyrma oryndalmady, - dep atap ótti Berdibek Saparbaev.
Taǵy bir másele – Tarazdyń Abaı, Qoıgeldi, Beıbitshilik jáne basqa da ortalyq kóshelerine qatysty bolyp otyr. Olardy jóndeý jumystary naýryz aıynda bastalýy tıis bolǵanymen, jospar oryndalmaǵan.
- Taraz ákimdigi uıyqtap otyr, qashan oıanatyny belgisiz, - dedi Berdibek Saparbaev. Oblys ákiminiń sózderi shuńqyrlar, aryq-jyralar kórinis tapqan slaıdtarmen súıemeldendi.
Tarazdy sanıtarlyq tazalaý jumystary da syn kótermeıdi, qalanyń ár buryshtarynda qoqys úıindileri jınalyp qalǵan.
Aıtqazy Qarabalaev tarazdyqtar karantın kezinde úıde otyryp, qaldyqtardy kóp shyǵaryp jatqandyǵyn aıtyp, aqtalýǵa tyrysty.
- Mundaı jaǵdaıda tıisti qyzmetterdiń aınalym sanyn arttyryp, qoqys konteınerlerin jıi tazalap otyrý kerek, - dedi aımaq basshysy.
