Berdibek Saparbaev Taraz ákimdiginiń jumysyn synǵa aldy
TARAZ. QazAqparat – Jambyl oblysynyń ákimi Berdibek Saparbaev aımaqtaǵy barlyq on aýdan ákiminiń esebin retimen tyńdap shyqty, kóshpeli esepti kezdesýlerdiń sońy Taraz qalasynyń ákimdiginde túıindeldi.
Basqosýda óńir basshysy qala ákimdiginiń jumysyn qatań syńǵa aldy, - dep habarlaıdy QazAqparat tilshisi.
Kezdesýde shahar basshysy Aıtqazy Qarabalaev oblys ortalyǵynyń áleýmettik-ekonomıkalyq damýy týraly esep berdi.
Osy jyldyń 7 aıynda aýyl sharýashylyǵy, ónerkásip sektory, qurylys salalarynda ósim baıqalady. Bul ótken jyldyń sáıkes kezeńimen salystyrǵandaǵy kórsetkish. Qala ákimi memlekettik baǵdarlamalar aıasynda qabyldanǵan sharalar týraly egjeı-tegjeıli baıandady.
«Jumyspen qamtýdyń jol kartasy» sheńberinde 16,9 mlrd. teńgege 389 jobany júzege asyrý josparlanǵan. Búginde 179 ýchaskedegi jumys tolyǵymen aıaqtaldy. Merdigerler jergilikti óndirýshilerdi qoldap, olardyń qurylys materıaldaryn paıdalanyp otyr», - dedi A.Qarabalaev.
Oblys ákimi qurylys jumystarynyń sapasy men oryndalý kestesine baqylaýdyń joqtyǵyn aıtyp, qala ákimdiginiń áreketin synǵa aldy.
Aıtalyq, «Jumyspen qamtýdyń jol kartasy» aıasynda jańa jumys oryndaryn qurý jospary 54,1 paıyzǵa oryndalǵan. Jumyssyzdardy jumyspen qamtýdyń belsendi sharalaryna tartý kórsetkishi 47,2 paıyzdy, áleýmettik jumys oryndaryn qurý boıynsha kórsetkish 34,8 paıyzdy quraıdy.
«Jumys oryndaryn ashýǵa memleket tarapynan kómek kórsetilip, qarajat bólinýde. Taraz qalasy ákimdiginiń basshylyǵyna barlyq vedomstvolardyń jumysyn úılestirý qajet edi. Endi jospardyń oryndalmaǵanyn aıtpaǵannyń ózinde, atqarylǵan jumystyń sapasy da syn kótermeıdi», - dedi Berdibek Saparbaev.
Qala boıynsha jalpy uzyndyǵy 36 388 metr naýalardy, 400 metr káriz qubyrlaryn aýystyrý josparlanǵan bolatyn. Naýalardy almastyrý jumystarynyń tek 44,5 paıyzy ǵana aıaqtalǵan, al káriz qubyrlaryn jańalaý jumysy áli bastalmaǵany belgili boldy. Jospar boıynsha bul jumystar 15 qyrkúıekte aıaqtalýy tıis edi. Sondaı-aq, 61 aýlada abattandyrý jumystary aıaqtalǵan, 93 aýlada jalǵasýda. Alaıda 9 aýlada bul jumystar áli qolǵa alynbaǵan.
Berdibek Saparbaev kemshilikterdi retteý boıynsha naqty merzimderdi belgilep berdi. Sondaı-aq qoqys shyǵarýmen baılanysty máselelerdi sheshýdi tapsyrdy.
Aıtqazy Qarabalaevtyń aıtýynsha, qalada qoqys shyǵarý qyzmetin 8 kompanııa atqarady. Olardyń balansynda 52 tehnıka bar. Eger ótken jyly «Jasyl El-Taraz» JShS 27jańa kólik satyp alǵan bolsa, bıyl taǵy 4 mashına satyp alǵan. Soǵan qaramastan, tehnıka tapshylyǵy áli bar.
«Eger ol kompanııalar ózderin tehnıkamen qamtamasyz etip, qalypty jumys júrgize almasa, onda basqa kompanııalarǵa osy bıznesti júrgizýge múmkindik berińizder. Kún saıyn qaladaǵy qoqysqa qatysty turǵyndardan shaǵymdar túsip jatyr. Shynyn aıtsam, qalalyqtardyń aldynda maǵan uıat. Oblys ortalyǵynda mundaı másele bolmaýy kerek. Qala ákiminiń osy salaǵa jaýapty orynbasary tańerteńnen keshke deıin tazalyq pen tártipti jeke ózi qadaǵalap otyrýy tıis. Qoqys máselesin tolyǵymen sheshý úshin týra bir aı ýaqyt beremin. Biz bul taqyrypqa endi oralmaıtyn bolaıyq. Olaı bolmaǵan jaǵdaıda, oǵan jaýapty adamdardyń jeke jaýapkershiligi qaralatyn bolady», - dep eskertti Berdibek Saparbaev.
Aımaq basshysy tarazdyqtardyń jyl saıyn júrgiziletin qaladaǵy qurylys jumystarynan jalyqqanyn aıtyp: «Aldymen jylý jelilerin jóndeý úshin, sodan keıin káriz qubyrlaryn aýystyrý úshin joldardy qazasyzdar. Bul jumystardy qatar jasaýǵa bolmaı ma? Mundaı ádisti birjola doǵarý kerek. Kelesi jyly barlyq jumystar bir ýaqytta júrgizilýi úshin naqty jospar ázirleńizder. Esterińizde bolsyn, bıylǵydaı ystyq sý ýaqytyly berilýi tıis. Kelesi jazda ystyq sýdy búkil maýsym boıy óshirýdi oıǵa da almańyzdar. Biz bul tájirıbeni endi eshqashan qoldanbaımyz», - dedi aımaq basshysy.
Kezdesý barysynda Taraz qalasynyń basshylyǵyna oblys ortalyǵyndaǵy beınekameralardyń jetkiliksiz ekendigi eskertildi. «Qaýipsiz qala» jobasy áli de talqylanýda. Qysqa merzimde terrorızmge qarsy komıssııa qurý, dinı radıkalızmniń aldyn alýdy kúsheıtý júkteldi.
Sondaı-aq, azamattarǵa beriletin áleýmettik tólemderdi ýaqtyly qamtamasyz etýdi, tartylatyn ınvestıtsııalar kólemin ulǵaıtýdy, bıznesin keńeıtýdi qalaıtyn kásipkerlerdi qoldaýdy jáne koronavırýs pandemııasynyń ekinshi tolqynyna tyńǵylyqty daıyndalýdy tapsyrdy.
«Kabınette otyryp alyp, bári bitken soń áreket etesizder. Qurǵaq sózderden arylyp, naqty nátıjelerge jumys isteý kerek»,- dep sózin aıaqtady Berdibek Saparbaev.
