Berdibek Saparbaev sý tasqynynyń aldyn alý jumystaryn synǵa aldy
TARAZ. QazAqparat – TARAZ. QazAqparat – Jambyl oblysynda kóktemgi sý tasqynynyń aldyn alý boıynsha qandaı sharalar júrgizilýde? Bul týraly aımaq basshysy Berdibek Saparbaevtyń tóraǵalyǵymen ótken jıyn barysynda aıtyldy, dep habarlaıdy QazAqparat tilshisi.
Kóktem saıyn aldymyzdan kese kóldeneń kezigetin keleńsizdik – ol sý tasqynyna qarsy kúres. Osy rette aımaq basshysy jyl saıyn qaıtalanatyn jaǵdaıǵa qatysty belsendi sharalardyń qoldanylmaı otyrǵanyn synǵa aldy.
«Jyl saıyn aıtatynymyz bir áńgime, baıaǵy jartas – sol jartas. Men kanaldar men aryqtardy, ásirese Taraz qalasynyń aýmaǵyndaǵylardy únemi tazalap otyrý kerektigin aıta-aıta sharshadym. Tasqyn Talas, Baızaq jáne Jýaly aýdandarynda qaıtalanady. Ákimder qaıda qarap otyr? Eger bóget qajet bolsa, ony salaıyq. Nelikten jańbyr jaýyp, qardyń erigenin kútip otyrýymyz kerek? Tótenshe jaǵdaılar departamentiniń jumysy sylbyr. Eger osylaı jalǵasa berse, men tıisti mınıstrlikke oblystaǵy departamenttiń basshylyǵyn aýystyrý týraly másele qoıamyn.
Profılaktıkalyq jumys óte álsiz deńgeıde júrgiziledi»,-dedi oblys ákimi.
Sodan keıin Berdibek Saparbaev oblystyń keıbir aýdandarynda bolǵan sý tasqynynyń sebepterin anyqtaýǵa nazar aýdardy. Taraz qalasynyń ákimi Erjan Jylqybaev 164 shaqyrym aryqtyń 72 shaqyrymy jeke sektorda ornalasqanyn atap ótti. Kóptegen aryq bitelip qalǵan, ústine úıler salynyp ketken, drenajdy qubyrlar joq.
Búginde árbir jeke jaǵdaıda máseleni sheshýmen aınalysatyn, qala turǵyndarymen túsindirý jumystaryn júrgizetin jumys toptary quryldy. Qala ákimi Tarazdyń negizgi arnalaryn kir men qoqystardan tazartý úshin mehanıkalandyrylǵan jasaqtardy qoldanýdy surady.
«Jaýyn birneshe kún ǵana jaýyp, kóptegen qıyndyqtar týǵyzdy. Al kún jylyp, taýda qar erı bastaǵanda ne bolady? Sonymen qatar, biz sý jınaýdy úırenýimiz qajet. Qazir sýdyń mólsheri mol bolyp tur, alaıda sýǵarý kezeńinde tirshilik nárin tappaı qalamyz. Bizge toǵandar salý, aryqtardy tazartý kerek», – dedi aımaq basshysy.
Aýyl sharýashylyǵy basqarmasynyń basshysy Qaırat Amanov kóktemgi dala jumystaryna daıyndyq barysy týraly baıandady. Óńir basshysynyń egistik alqaptaryndaǵy jumystardyń qarqyn ala almaı jatqanyna kóńili tolmady.
«Jyl saıyn aýyl sharýashylyǵy daqyldary ósiriletin jerdi kem degende 40 myń gektarǵa keńeıtý qajet. Kókónis, qyzylsha, baqsha daqyldaryn kóbeıtýimiz kerek. Salynyp jatqan iri qant zaýytyna shıkizat qajet. Іrgedegi Almaty oblysy 20 myń gektardan astam alqapta qyzylshany jaıqaltyp otyrǵanda, bizdigi bes myń gektar nege jetedi? Keń jarnamalanǵan qulpynaı men tańqýraı ósirý boıynsha túrik ınvestorlarymen birlesken jobanyń nátıjeleri qaıda?» – dep surady oblys ákimi.
Aımaq basshysy qyzylsha ylǵaldy súıetin daqyl bolǵandyqtan, ony kóptep ósirýge sý jetkiliksiz bolýy múmkin degen syltaýmen kelispedi.
«Búginde qoldanystaǵy sý qoımalary toltyrylýda, jańalary salynýda, sýdy únemdeıtin tehnologııalar belsendi engizilýde. Sondyqtan sýmen eshqandaı problemalar bolmaýy tıis, qant qyzylshasynyń daqyldaryn kóbeıtý kerek», – dedi oblys ákimi.
