Berdibek Saparbaev: Shydamym taýsylǵanda, kesh bolady
AQTÓBE. QazAqparat - Aýyldaǵy mektepter jartylaı bos tur. Sol jerdi mektepke deıingi uıym etip ashyp, balabaqsha máselesin sheshýge bolady. Jumysty biryńǵaılaýǵa tapsyrma berilgenimen, esh nátıje joq.
Bir kúni shydamym taýsylady, sol kezde kesh bolady. Bul týraly óńir basshysy Berdibek Saparbaev oblystyq qurylys jáne sáýlet basqarmasynyń jıynynda aıtty, dep habarlaıdy QazAqparat tilshisi.
Aqtóbede bilim berý salasyna baǵyttalǵan qurylys jumystary qarqyndy júrip jatyr. Jospar boıynsha bıyl 8500 balaǵa arnalǵan 20 mekteptiń qurylysy bastalýy tıis. Bıyl 14 qurylys jumysy aıaqtalyp, altaýy 2018 jyly paıdalanýǵa beriledi. Aqtóbe oblystyq qurylys jáne sáýlet basqarmasynyń esep berý jıynynda óńir basshysy Berdibek Saparbaev jartylaı bos turǵan mektepterdi tıimdi paıdalaný tapsyrmasynyń oryndalmaǵanyn aıtty. Bul syndy oblystyq bilim basqarmasynyń basshysy Sáýle Ómirbekova únsiz tyńdady.
«Oblystyq bilim basqarmasyna mektepterdi qarap, balalar sanyn eseptep, aýyldyń jaǵdaıyn bilip, naqty jospar qurý tapsyryldy. Biraq tapsyrma áli kúnge deıin oryndalǵan joq. Ár aýdanda qansha mektep bar, aýylda bos turǵan mektepti qaıta jańartyp, ony balabaqshaǵa berý máselesi de tıimdi sheshilmedi. Máselen, bıyl 23 mektep berilse, sol 23 nysan bosap qalady. Sol nysandy tez arada jóndep, balabaqshaǵa berýge bolady. Aıtamyz, oryndalmaıdy. Shydamym taýsylǵanda, kesh bolady»,- dedi Berdibek Saparbaev.
Aıta keteıik, Aqtóbe oblysy boıynsha 3-6 jas aralyǵyndaǵy balalardy baqshamen qamtý 92 paıyzdy qurap otyr. Oblys ákimi Berdibek Saparbaev bul kórsetkishti bıyl 97 paıyzǵa jetkizip, aýdandardy 100 paıyzǵa jetkizý jolyn retteýdi tapsyrdy.
