Berdibek Saparbaev Shý aýdanynyń aýyldaryn aralady
Aımaq basshysy Aqsý aýyldyq okrýgine at basyn buryp, «Óteýil» sharýa qojalyǵynyń jumysyn barlady. Sharýa qojalyǵynyń basshysy Shamıl Sársenbaevtyń aıtýynsha, bıylǵy egistik nátıjesinde olar 450 gektar jerge arpa jáne dál osyndaı aýmaqqa kúzdik bıdaı sepken. Búginde qojalyq dándi daqyldarǵa oraq túsire bastaǵan desek, bıdaıdyń ortasha shyǵymy gektaryna 23-25 tsentnerden, jazdyq arpa 18-20 tsentnerden aınalýda.
Sharýashylyqta óz qarajatyna satyp alynǵan alty traktor, eki kombaın jáne basqa da qajetti tehnıkalar bar. On adam turaqty negizde jumyspen qamtylǵan, qosymsha taǵy 15 adam dalalyq jumystarǵa tartylýda.
Qojalyq mal sharýashylyǵymen de aınalysady. Atap aıtqanda, onda jylqy, iri qara maly, sonymen qatar qoı ósirilýde. Sharýashylyqtyń bordaqylaý alańynda jyl saıyn 30 shaqty iri qara maly baılanyp, ónimder Merki aýdanyna ótkeriledi. Sút ónimderi men qymyz da jetkilikti deńgeıde.
Aýdan ákimi Nurjan Kalenderov atap ótkendeı, ár aýylda kúnine eki tonnaǵa deıin sút qabyldanady. Ókinishke qaraı, aımaqtaǵy jalǵyz sút óńdeý kásiporny «Aıshot» JShS de óz jumysyn toqtatqan. Berdibek Saparbaev N.Kalenderovke atalǵan máseleni ýaqyt sozbaı sheshýdi tapsyrdy.
Budan soń oblys ákimi mııa tamyryn óńdeýmen aınalysatyn «KazMia» JShS-de boldy. Bul ónimge suranys ta jetkilikti, ótkizý naryǵy da qamtylǵan. Alaıda, búgingi tańda kásiporyn shıkizattyń tómen sapasyna baılanysty qıyndyqtardy bastan keshýde. Bıyl mııa tamyry 250 gektar jerge otyrǵyzyldy desek, endi olar ónimniń negizgi ımporttaýshysy bolyp tabylatyn Japonııadan shıkizat sapasyn baqylaý nátıjelerin kútýde. Eger sapa oıdaǵydaı bolsa, kompanııa mııa tamyryn ósirý aýmaǵyn keńeıtýge nıetti.
Sondaı-aq, Berdibek Saparbaev Aqsý aýyldyq okrýgine qarasty Orazaly batyr aýylyna baryp, jergilikti feldsherlik-akýsherlik stantsııanyń jaı-kúıimen, Eskishý aýyldyq okrýgine qarasty Belbasar aýylynda aımaq basshysy Sh.Ýálıhanov atyndaǵy orta mektep ǵımaratynyń kúrdeli jóndeý jumystarymen tanysty.
Aımaq basshysy Shý qalasy Sátpaev kóshesindegi kópqabatty turǵyn úılerdi qalpyna keltirý jáne ortasha jóndeý jumystarynyń barysyn da barlady.
Berdibek Saparbaev Shý qalalyq emhanasynda bolyp, jergilikti turǵyndarmen áńgimege tartty. Olar óz kezeginde medıtsıanylyq mekemeniń jumys istemeıtin flıýorografııa jáne rentgen kabınetterine qatysty shaǵymdaryn jetkizdi.
Sol sebepti, shýlyqtar aýdan ortalyǵyna baryp, aqyly tekserilýge májbúr. Emhana basshylyǵy jabdyqtardyń kidirisin elektr jelisiniń tómen kerneýinen oryn alyp otyrǵandyǵyn túsindirdi.
Oblys ákimi aýdan men emhana basshylyǵyna bul máseleni baqylaýǵa alyp, aldaǵy ýaqytta qalaı da sheshýdi tapsyrdy.
