Berdibek Saparbaev: ShQO-da 46 myń adam ataýly kómek alady

ÓSKEMEN. QazAqparat - ShQO-da 46 myń adamǵa ataýly áleýmettik kómek taǵaıyndalady. Bul týraly Eńbek jáne halyqty áleýmettik qorǵaý mınıstri Berdibek Saparbaev Úkimet músheleriniń oblys aktıvimen kezdesýinde aıtty, dep habarlaıdy QazAqparat tilshisi.

Qazaqstan Respýblıkasy Premer-Mınıstriniń orynbasary Gúlshara Ábdiqalyqova bastaǵan Úkimettik jumys toby oblystyń aktıvimen kezdesip, áleýmettik baǵdarlamalardyń mán-mańyzy men negizgi baǵyttaryn túsindirdi.

Eńbek jáne halyqty áleýmettik qorǵaý mınıstri Berdibek Saparbaev birinshi maýsymnan bastap bilim, mádenıet, medıtsına, sport, áleýmettik sala qyzmetkerleriniń, oblystyq jáne aýdandyq ákimdik mamandarynyń eńbekaqysy 15-30 paıyz kóleminde ósetinin málim etti.

Mınıstrdiń aıtýynsha bul ózgeristi qýattaıtyn normatıvtik aktiler men buıryqtardyń barlyǵyna qol qoıylǵan.

Al kópbalaly otbasylarǵa beriletin tólem kólemge Qazaqstan boıynsha 830 myńǵa jýyq adam qol jetkizbek. Onyń ishinde 46 myń shyǵysqazaqstandyq bar.

«Birinshi sáýirge deıin bir adamǵa beriletin ataýly kómek 4834 teńge bolsa, endi bul soma 20789 teńge bolmaq. Tabysty qaıta esepteý kezinde áleýmettik tólemaqylar men shákirtaqy eseptelmeıdi. Endi halyqtan zeınetaqy men qoldaǵy azyn-aýlaq maldan túsetin tabysty esepteýge ózgeris engizseńizder degen usynys túsip jatyr. Baǵdarlama 10 jylǵa arnalǵan. Ol jaǵyn da oılastyryp jatyrmyz. Usynystyń bári kezeń-kezeńmen, zańǵa sáıkes qaralady» - dedi Berdibek Saparbaev.

Mınıstrdiń aıtýynsha, múgedektik boıynsha tólenetin járdemaqy kólemi 10 myń teńge óspek. Mundaı kómekke elimiz boıynsha 100 myńnan astam adam muqtaj. Shyǵys Qazaqstan boıynsha 6000-nan astam adamǵa atalǵan járdemaqy taǵaıyndalmaq.