Berdibek Saparbaev: Sheteldik jumys kúshine jyl saıynǵy kvota 30 myńnan aspaıdy
NUR-SULTAN. QazAqparat – Sheteldik jumys kúshine beriletin jyl saıynǵy kvota 30 myńnan aspaıdy. Bul týraly Ulttyq akademııalyq kitaphanada zııaly qaýym ókilderimen kezdesken vıtse-premer Berdibek Saparbaev aıtty, dep habarlaıdy QazAqparat tilshisi.
«Eski tehnologııasy bar birde-bir zaýyt Qazaqstanǵa kelmeıdi. Bul eń birinshi talap bolatyn. 55 zaýyt bola ma, basqa ma, olardyń barlyǵy jańa tehnologııalarmen jumys isteıdi. Ekinshiden, ekonomıkamyz damýy úshin ınvestıtsııalar qajettigin jaqsy bilesizder. Munsyz bolmaıdy. Bizdiń ınvestıtsııalar jetkiliksiz. Qazaqstan ekonomıkasynyń damýynyń jalǵyz kózi – bul túsip jatqan ınvestıtsııalardyń nátıjesi. Boljam boıynsha, atalǵan 55 zaýyttyń esebinen Qazaqstanǵa 28 mlrd dollar ınvestıtsııa keledi. Biraq biz kimniń keletinin, onda kimder jumysqa tartylatynyn qaraıtyn bolamyz. Bizde zań jáne tártip bar. Jyl saıyn sheteldik jumys kúshin tartýǵa kvota bólinedi. Kvotalardyń sany 23 myńnan bastalady, biraq 30 myńnan aspaıdy. Zaýyt salynǵannan keıin osynshama jumys orny qurylýy tıistigi týraly aıtamyz. Mysalǵa, qytaılyq ınvestıtsııalarǵa baılanysty 20 myńnan kem emes jumys orny qurylýy qajet. Sheteldik jumys kúshine 23 myń adam kóleminde kvota bólindi. Olardyń ishinde qytaılyqtar da, eýropalyqtar, úndister jáne taǵy basqalary bar. Sonyń arasynda qytaılyqtarǵa kvota 4300-di quraıdy. Úsh jyl buryn olarǵa kvota 12 myńdy quraǵan bolatyn», - dedi B.Saparbaev.
Úkimet basshysynyń orynbasary atap ótkendeı, Úkimet sheteldik jumys kúshiniń tym asyra aǵylýyna jol bermeıdi. Sebebi bul memlekettiń áleýmettik saıasatyna kereǵar. Onymen birge, Úkimet biliktiligi tómen sheteldik jumysshylardy elge kirgizýge tyıym salatyn qatań erejelerdi bekitti. Bul rette, eger sheteldik kompanııa Qazaqstanda qajetti mamandardy tappasa oǵan kvota beriledi. Biraq onda da bir shartpen – belgili bir ýaqyt ishinde mundaı mamandardy qazaqstandyq qyzmetkerler arasynan daıyndap shyǵýy tıis bolady.
Sondaı-aq B.Saparbaev atap ótkendeı, qazir qazaqstandyqtarmen salystyrǵanda sheteldik jumysshylardyń jalaqysynyń negizsiz kóp bolýyna tekseris júrgizilip jatyr.
