Berdibek Saparbaev Semeı jastarymen júzdesti
ASTANA. 19 qazan. QazAqparat - Shyǵys Qazaqstan oblysynyń ákimi Berdibek Saparbaev Shákerim atyndaǵy Semeı memlekettik ýnıversıtetinde Semeı qalasynyń belsendi jastar uıymdarynyń jetekshilerimen, stýdent jastarmen kezdesti,
dep habarlaıdy qala ákiminiń baspasóz qyzmeti.
Kezdesýge densaýlyq, bilim, ǵylym, mádenıet, sport salasyndaǵy jas mamandar, óndiris salasyndaǵy jumysshy jastar, joǵary jáne arnaýly orta oqý oryndarynyń stýdentteri, stýdenttik «Jasyl El» jáne qurylys jasaqtarynyń músheleri jáne t.b. jastar uıymdarynyń músheleri qatysty.
Kezdesýdiń basty maqsaty - jastar saıasatyn, aımaqtyq jastar baǵdarlamalaryn júzege asyrý, oblys jastarynyń belsendiligin arttyrý, jastardyń azamattyq jáne rýhanı damýyna jaǵdaı jasaý.
-Elimizdi irgeli memleketke aınaldyrý sizderdiń qoldaryńyzda, ıaǵnı bolashaǵymyz jastardyń jaýapkershiliginde. Sondyqtan jastar qaýymy ýaqyttyń kez kelgen synaǵyna, básekege tótep berýge daıyn bolýy kerek. Otanymyzdyń sanasy sergek, jańa zamannyń tehnologııalaryn meńgergen naǵyz patrıottary ǵana osyndaı synaqtardan súrinbeı óte almaq, - dedi kezdesýde oblys ákimi B.Saparbaev.
Oblysta 395 myńnan astam jas bar. 120-dan astam jastar uıymy jumys isteıdi. Búgingi tańda jastardyń hal-ahýaly qandaı, olar nemen aınalysyp júr, bos ýaqyttaryn qalaı ótkizedi, mine, osy máseleler tóńireginde qaladaǵy jastar uıymdarynyń basshylary baıandama jasap, atqaryp jatqan jumystarymen tanystyrdy.
Jastar Semeı qalasyndaǵy sporttyq ǵımarattardy retke keltirip, stýdentterge paıdalanýǵa berý, stýdentterdiń jolaqysyn oblys ortalyǵyndaǵy tarıfpen teńestirýdiń joldaryn qarastyrý, Kóńildiler men tapqyrlar klýbynyń oblystyq lıgasyn qurý jáne damytý máselelerin oblys ákimine jetkizdi. Berdibek Saparbaev kezdesý barysynda kóterilgen máselelerdi óz nazaryna alatyndyǵyn atap kórsetti.
- Kóterip otyrǵan problemalaryńyz durys, osylaısha pikirlerińizdi ashyq bildirýdi úırengen jón. Qaı iste bolmasyn ózara pikir almasyp, ortaq sheshim shyǵarǵan tıimdi, -dedi aımaq basshysy.
