Berdibek Saparbaev: Óńirde jergilikti qamtýdy arttyrý boıynsha jumys tıisti deńgeıde júrgizilmeıdi
Osy oraıda Úkimettiń keńeıtilgen otyrysynda Memleket basshysy Qasym-Jomart Toqaev jaýapty tulǵalarǵa tıisti tapsyrma júktegen bolatyn.
Oblystyq kásipkerlik jáne ındýstrıaldy-ınnovatsııalyq damý basqarmasynyń basshysy Aspandııar Seısebaevtyń aıtýynsha, memlekettik satyp alýlardaǵy jergilikti qamtý úlesi 84 paıyzdy quraıdy. Bul kórsetkish ónerkásiptiń «Qarapaıym zattar ekonomıkasyna» qatysty alty baǵyt boıynsha 74 paıyzdy, qurylys-montajdaý jumystarynda 86 paıyzdy kórsetken.
Memlekettik satyp alý basqarmasynyń basshysy Baqytjan Júnisbekov memlekettik satyp alýdaǵy negizgi mindetter retinde jergilikti qamtý úlesin arttyrý boıynsha eseptilik, ónim jetkizýshilerdiń jergilikti qamtýdyń eń joǵary úlesine degen múddeliligi, sondaı-aq otandyq óndirýshilerdi memlekettik qoldaý bolyp tabylatyndyǵyn tilge tıek etti.
«Ótken jyldyń basynda biz qurylystaǵy jergilikti qamtý úlesin 90 paıyzǵa deıin jetkizýge keliskenbiz. Bul mindetteme oryndalmady. Basqarma basshylary turaqty túrde tıisti oryndarǵa hat jiberetinderin aıtady.
Demek, odan keıin bul eshkimdi qyzyqtyrmaıdy, jaǵdaı qadaǵalaýsyz qalady. Sondyqtan, nátıje joq. Óndirýshiler negizinen Tarazda ornalasqan, biraq olarmen jergilikti qamtýdy arttyrý boıynsha tıisti deńgeıde jumys júrgizilmeıdi. Qalalyq ákimdik, oblystyq basqarmalar jáne óńirlik kásipkerler palatasy ózara tyǵyz baılanysta jumys isteýi tıis. Ázirge ondaı júıe baıqalmaıdy», - dedi oblys ákimi.
Sondaı-aq, Berdibek Saparbaev jergilikti qamtýda taýarlar assortımentin keńeıtý qajettiligi týraly basa aıtty. «Tek qıyrshyq tas pen shaǵaldy paıdalanýǵa qanaǵattanbaı, jańa taýarlar men materıaldar óndirisin jolǵa qoıýǵa umtylý kerek», - dep eskertti óńir basshysy.
