Berdibek Saparbaev óńirde qashyqtan bilim berý boıynsha júrgizilgen jumystardy synǵa aldy
TARAZ. QazAqparat – Jambyl oblysy ákimi Berdibek Saparbaevtyń tóraǵalyǵymen ótken jıynda Jambyl oblysy oqý oryndarynyń qashyqtan bilim berý barysy talqylandy, - dep habarlaıdy QazAqparat Jambyl oblysy ákiminiń baspasóz qyzmetine silteme jasap.
Jýyrda Baızaq aýdanyna jumys saparymen barǵan oblys ákimi jergilikti mektepterdiń birine bas suǵyp, birqatar jaıtqa qanyqqan bolatyn. Ondaǵy tozyǵy jetken partalar men taqtalarda balalardyń áli kúnge sabaq oqyp jatqanyn eskersek, joǵary jyldamdyqty ınternet týraly aıtýdyń ózi uıat.
«Kózboıaýshylyqpen aınalysýdy toqtatyńyzdar. Naqty ahýaldy kórsetińizder. Áıtpese, biz jaǵdaıdy jaqsarta almaımyz. Bul tek bilim berýde ǵana emes, óńirdegi barlyq salaǵa qatysty», - dedi aımaq basshysy keńes barysynda aýdan ákimderin jumysyn synǵa alyp.
«Tarazǵa jaqyn ornalasqan aýdandardaǵy mektep osyndaı bolsa, onda shalǵaı aýmaqtar týraly ne aıtýǵa bolady? Memleket basshysynyń qashyqtan oqytýǵa kóshý týraly tapsyrmasyn qalaı iske asyramyz?» – dedi oblys ákimi.
B. Saparbaevtyń aıtýynsha, óńirdiń bilim sapasyn jetildirý boıynsha jumystary syn kótermeıdi, al qashyqtan oqytýdy engizgennen keıin ol tipti tómen deńgeıge quldyrap ketý qaýpi bar.
Taldaý kórsetkendeı, kóptegen aýdan mektepterinde kompıýterler men monoblok jetispeıdi, al 125 aýyldyq eldi meken ınternetpen qamtamasyz etilmegen. «Qazaqtelekom» AQ ulttyq baılanys operatorynyń ókili mundaı qysqa ýaqytta bul máseleni sheshýge qatysty saýalǵa naqty jaýap bere almady.
Bastysy – balardyń óz úılerinde planshetter men noýtbýktermen qamtylýy. Bul tehnıkalarsyz oqytýdyń jańa formatyna kóshý múmkin emes.
Aımaq basshysy oblystyq bilim basqarmasy basshysynyń mindetin atqarýshy Jámılá Bekbatyrovaǵa barlyq mektepterdi qashyqtan oqytýǵa daıyndyq turǵysynan tekserý, oqýshylardyń úı jaǵdaıynda bilim alý múmkindikterin anyqtaý týraly naqty tapsyrmalar júktedi.
