Berdibek Saparbaev óńirde bıznesti damytý jumystary álsiz ekenin aıtty
AQTÓBE. QazAqparat - Aqtóbe oblysynyń bıýdjetine bıylǵy jyldyń 2 aıynda 21,1 mlrd teńge tústi. Bul ótken jyldyń sáıkes merzimimen salystyrǵanda 10,4% kóp. Óńirde ónerkásip ónimi 103,1% bolǵan. Ósim munaı, gaz, natrıı bıohromaty men ferroqosyndylar esebinen qamtamasyz etilip otyr, dep habarlaıdy QazAqparat oblys ákimdiginiń baspasóz qyzmetine silteme jasap.
Bıýdjet qarjysynyń jaı-kúıi oblys ákimdiginiń májilisinde talqylandy.
Ekonomıka jáne bıýdjettik josparlaý basqarmasy jetekshisiniń orynbasary Adılıa Qaırmekova qaıta óńdeý ónerkásibindegi óndiris kólemi 4,1% ósip, 2017 jyldyń sáıkes merzimimen salystyrǵanda 82,8 mlrd teńgeni quraǵandyǵyn aıtty. Aqtóbe men aýdandarda engizilgen turǵyn úılerdiń kólemi 14% ósip, aýyl sharýashylyǵyndaǵy óndiris ósimi 4,4% qurady.
Ekonomıka jáne bıýdjettik josparlaý basqarmasynyń málimetteri boıynsha Aqtóbe oblysy negizgi áleýmettik-ekonomıkalyq kórsetkishter boıynsha, jaqsy damyp keledi. Alaıda, Oıyl, Muǵaljar, Shalqar jáne Alǵa aýdandarynda ınvestıtsııa tartý kórsetkishteri aqsap tur. Oıyl aýdanynda sonymen qatar ónerkásip óndirisi 26,6% tómendep ketken, al Baıǵanın aýdanynda turǵyn úı qurylysy talapqa saı emes.
Osyǵan baılanysty óńir basshysy memlekettik organdarǵa, aýdandar men Aqtóbe qalasynyń basshylyǵyna kórsetkishterdi durystaýda tapsyrdy.
«Kórsetkishterdi durystaý úshin barlyq qajetti múmkindikterdi paıdalaný qajet. Memleket basshysynyń tapsyrmalary negizinde biz 2018 jyly ekonomıka ósimin 5% ulǵaıtýǵa mindetteme aldyq. Aldyǵa qoıǵan maqsatqa jetý úshin oblystyń áleýmettik-ekonomıkalyq ósim kórsetkishterin jyl basynan qolǵa alý kerek»,-dedi B.Saparbaev.
Buǵan qosa óńir basshysy «Bıznestiń jol kartasy-2020» baǵdarlamasy aıasynda júrgizilip jatqan jumystardyń álsizdigin aıtty. Jyl basynan beri 16 jobaǵa qoldaý bildirilgen. Ákim qalyptasqan jaǵdaıdy ońaltyp, azyq-túlik taýarlaryna, dári-dármekterge degen baǵanyń turaqtylyǵyn qamtamasyz etip, jumyssyzdyqpen kúresti shıratý jóninde tapsyrma berdi.
