Berdibek Saparbaev óńirde abattandyrý jumystaryn jandandyrýdy tapsyrdy
TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken jıynda kóktemgi abattandyrý jumystaryn júıeli túrde ótkizý boıysha qala, aýdan ákimderi men basqarma basshylaryna tıisti tapsyrmalar berildi,- dep habarlaıdy QazAqparat tilshisi oblys ákimdiginiń remı saıtyna silteme jasap.
Aımaq basshysy qysqa ýaqytta oblys boıynsha 140 myń túp tal kósheti otyrǵyzylǵanyn tilge tıek etip, olardy kútip-baptaý sharalarymen oblystyq tabıǵı resýrstar jáne tabıǵat paıdalanýdy retteý jáne aýyl sharýashylyǵy basqarmasynyń basshylyǵy barynsha belsendi aınalysýy kerektigin basa aıtty.
Olarǵa aldaǵy ýaqytta tal-daraqtardy kútip-baptaý men sýarýǵa kóńil bólý mindetteldi. Sondaı-aq óńir basshysy oblys ortalyǵynyń aınalasyn jasyl jelekke aınaldyrý boıynsha jumystardy júıeli túrde júrgizýdi júktedi.
«Oblystyq tabıǵı resýrstar jáne tabıǵat paıdalanýdy retteý basqarmasynyń mamandary qazirden shahardaǵy taldardy butap, qýraǵandaryn ýaqyt ozdyrmaı kesip tastaýy tıis. Senbilikter aıasynda egilgen myńdaǵan kóshetter sýsyz qalmaýy kerek. Sondaı-aq bul sharalar aýdandar da júzege asyrylyp, ákimder senbilikterdiń uıymdastyrylýyna nazarǵa alýy mindetti. Ras, indetke baılanysty jarııalanǵan karantınnen soń turǵyndardyń taza aýada júrip-turǵysy keledi. Bul oraıda, saıabaq-skverlerdi de retteý mańyzdy. Osyǵan baılanysty ár mekemege saıabaq-skverler bólinip berildi. Endi olar ózderine tıesili oryndardyń tazalyǵyn retke keltirip, kógaldandyrýdy qolǵa alýy shart», – dedi B.Saparbaev.
Kásipkerler men sharýalar da Taraz qalasyn kórkeıtýge atsalysýy tıis. Sonymen qatar bul bastamadan «Nur Otan» partııasy da, depýttar da shet qalmaýy kerek.
«Jasyratyny joq, osy ýaqytqa deıin qala ıesiz qalǵandaı sezildi. Endi negizgi jumystardyń barlyǵy shahardyń kórkeıýine baǵyttalatyn bolady. Ras, qalanyń túngi jaryqtandyrylýy men jarnamalardyń sapasy syn kótermeıdi. Munyń barlyǵy retke keltirilip, jyldam sheshilýi tıis. Sonymen qatar oblys ortalyǵynda qurylysy aıaqtalmaǵan «saqaldy» qurylystar da jeterlik. Bul da kezek kúttirmeıtin negizgi sharalardyń biri. Budan ózge turǵyn úılerdiń qasbetteri boıalyp, olarǵa jańǵyrtý jumystaryn júrgizý kerek. Sýarý júıelerin de retke keltirý qajet», – dedi oblys ákimi.
Jıynda budan ózge kóktemgi dala jumystary da qaýzaldy. Oblystyq aýyl sharýashylyǵy basqarmasynyń basshysy tuqymnyń sapasy men tyńaıtqyshtardyń ýaqytynda jetkizilýin qamtamasyz etýge mindetteldi. Sondaı-aq aýdan ákimderi men basqarma basshylaryna kóktemgi sanıtarlyq tazalaý, abattandyrý men kógaldandyrý jumystaryn kúsheıtýde tapsyrdy.
