Berdibek Saparbaev: Ońaltý quraldary múgedektigi bar azamattardyń ómirin jeńildetýi tıis
Keńeske
jumyspen qamtýdy úılestirý jáne áleýmettik baǵdarlamalar, aýyl sharýashylyǵy,
eńbek ınspektsııasy, memlekettik kiris basqarmalarynyń, Eńbek, áleýmettik qorǵaý
jáne kóshi-qon departamentteriniń, halyqty jumyspen qamtý ortalyqtarynyń,
ónerkásip kásiporyndarynyń basshylary, úkimettik emes uıymdar men «Atameken»
kásipkerler palatasynyń ókilderi qatysty.
Keńeske qatysýshylar ataýly áleýmettik kómek kórsetý, jańa jumys oryndaryn qurý, halyqty jumyspen qamtý jáne qyzmetkerlerdiń eńbek quqyqtaryn saqtaý máselelerin qarady.
«Ústimizdegi jyldyń 1 sáýirinen bastap, AÁK boıynsha keńes alý úshin ýákiletti organdarǵa 14314 adam júgindi. Olardyń barlyǵyna tolyq jaýaptar men usynystar berildi. Búgingi kúni 32 670 adam turatyn 5 748 otbasyna jalpy somasy 1,3 mlrd teńge ataýly áleýmettik kómek taǵaıyndalyp, tólendi», - dep habarlady Atyraý oblysy ákiminiń birinshi orynbasary Serık Shapkenov.
Óz kezeginde Berdibek Saparbaev óńirde júrgizilip jatqan jumystarǵa oń baǵa berip, birqatar ózekti máselelerge nazar aýdardy.
Mınıstr el Prezıdentiniń tapsyrmasyna sáıkes jergilikti jerlerde AÁK taǵaıyndaý jáne tóleý kezinde buzýshylyqtarǵa jol bermeýdi qamtamasyz etý, ýchaskelik komıssııalardyń jumysyn kúsheıtý jáne eńbekke jaramdy járdemaqy alýshylarmen áleýmettik kelisim-sharttar jasasý qajettigin atap ótti.
Jumyssyz jáne ózin-ózi jumyspen qamtyp otyrǵan azamattardy «Eńbek» memlekettik baǵdarlamasy aıasynda jumyspen qamtýǵa járdemdesýdiń belsendi sharalaryna tartý Eńbek mınıstri basa nazar aýdarǵan mańyzdy máselesiniń biri boldy.
«Aǵymdaǵy jyly jastarǵa, múgedektigi bar azamattarǵa, kópbalaly jáne az qamtylǵan otbasylarǵa jeńildikti mıkrokredıtter berý, óz bıznesin ashýǵa arnalǵan granttar, úıden áleýmettik jumys oryndaryn qurý, bıznestiń negizderin oqytý jáne tehnıkalyq mamandyqtar talap etetin memlekettik qoldaý sharalarynyń aıasy aıtarlyqtaı keńeıe tústi. Prezıdent tapsyrmasyna sáıkes bul maqsatqa qosymsha 50 mlrd teńge bólinip otyr», - dedi mınıstr.
Sondaı-aq, keńes barysynda múgedektigi bar adamdardy áleýmettik qorǵaý sharalary talqylandy. Vedomstvo basshysy osy sanattaǵy azamattardy sapaly jáne tehnıkalyq talaptarǵa tolyq sáıkes keletin tehnıkalyq ońaltý quraldarymen qamtamasyz etýdiń mańyzdylyǵyn atap ótti.
«Tehnıkalyq quraldardyń qoldanýǵa yńǵaıly bolýy men ómirdi naqty jeńildetýi mańyzdy másele. Osyǵan baılanysty Aqtóbede «Áleýmettik qyzmetter portaly» pılottyq jobasyn júrgizý bastaldy. Bul portal múgedektigi bar azamattarǵa óz betinshe, memlekettik satyp alýǵa qatyspaı, jeke qajettilikterin eskere otyryp, óziderine kerekti tehnıkalyq ońaltý quraldaryn men qyzmetterdi tańdaýǵa múmkindik beredi. Jalpy alǵanda, mınıstrliktiń mańyzdy basymdyǵy - múgedektigi bar azamattardyń quqyqtaryn qamtamasyz etý men ómir súrý sapasyn jaqsartý bolyp tabylady», - dedi Saparbaev.
Elimizdiń barlyq oblystarynda ońaltý ortalyqtary jumys isteýi tıis. Kelesi kezeń aýdandarda shaǵyn jınaqty ortalyqtardyń ashylýy bolmaq, dep atap ótti mınıstr.
Aıta keterligi, aǵymdaǵy jyldyń mamyr aıynda múgedektigi bar azamattardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar qabyldandy. Ol josparǵa áleýmettik qorǵaý, bilim berý, densaýlyq saqtaý, áleýmettik qyzmetkerlerdiń biliktiligin arttyrý sııaqty sharalar kesheni kiredi.
Ónerkásip kásiporyndarynyń basshylaryna qaratyp aıtqan sózinde Berdibek Saparbaev qyzmetkerlerdiń eńbek quqyqtarynyń múltiksiz saqtalýy, qolaıly jáne qaýipsiz eńbek jaǵdaılaryn qamtamasyz etý, jalaqy boıynsha bereshek máselesi men qazaqstandyq jáne sheteldik qyzmetkerlerdiń kemsitýshiligine jol bermeý qajettigin eske saldy.
Sonymen qatar, Atyraýǵa jumys sapary barysynda Berdibek Saparbaev arnaıy áleýmettik qyzmet kórsetý ortalyǵy men halyqty jumyspen qamtý ortalyǵynyń jumys barysymen tanysty.
