Berdibek Saparbaev oqýshylarǵa ákim bolýdyń jolyn aıtyp berdi

 Aqtóbe oblysy, Mártók aýdany, Saryjar aýylynyń oqýshylary buryn dálizdi kabınet etip jasaqtap, úsh aýysymda bilim aldy. Jyl ótken saıyn halyq sany artyp, taıaýda 800 jer telimi paıdalanýǵa berildi. Mektep máselesi eki jylda sheshimin taýyp, búgin balalardyń bir bóligi jańa mektepke qonys aýdardy.
 

«Eski mektepte 1 myńǵa jýyq bala bilim aldy. Ári mektep janynda balalarǵa arnalǵan shaǵyn ortalyq bar. Mektep avtobýsy aýyl ishin aralap, shalǵaı turatyn oqýshylardy tasymaldady. Oryn tapshylyǵynan dálizder jabylyp, synyptarǵa berildi. Muǵalimder bólmesi bolmady. Endi bul máseleler artta qalyp, jańa mektep úshaýysymdy mektep máselesin sheship otyr»,- dedi Saryjar orta mektebiniń dırektory Ádilbek Tájibaı.

Jańa mektep alǵashqy jyldary bir aýysymda jumys isteıdi. Barlyǵy 350 oqýshy jańa mektepke kóshirilmek.
 

«Eski mektepte júrgende keshki saǵat 7:20-da sabaqtan shyǵatyn edik. Mektebimiz alys boldy. Al jańa mektepte májilis zaly erekshe, ár pánniń óz kabıneti bar. Biz mundaı jaǵdaıdy buryn kórmedik»,- deıdi 8 synyp oqýshysy Nurjaý Baltabaev.

Jańa mekteptiń qurylys jumystaryna 700 mıllıon teńgege jýyq qarjy bólindi. 9 aıda qurylys jumysy aıaqtalyp, pándik kabınetter jańa qural-jabdyqpen túgel qamtyldy. Munda avtonomdy jylý qazandyǵy bar. Jańa ǵımaratqa kóshken oqýshylardy quttyqtaǵan oblys ákimi Berdibek Saparbaev olarǵa bilimdi adam ǵana úlken bıikterdi baǵyndyratynyn jetkizdi.
  

 «Balalar dostarynan, qurby-qurdastarynan qalyp qoımaı, zaman talabyna saı bilim alýy kerek. Ata-ana «mektepte muǵalim bar, oqytady» dep balasyna nemquraıly qaramaýy tıis. Qazirgi zamanda bilimiń bolmasa, jan-jaqty damymasań ómiń súrýiń qıyn bolady. Balalar, kóp oqý qajet. Telefonǵa kóp qaramaı, gazet, kitap oqyǵan durys. Keıingi jyldary balalar shyǵarma, mazmundamany ǵalamtordan kóshirýge áýes. Ol kezde adam oılanbaıdy, bárin daıyn kúıinde paıdalanady. Balalar jaqsy bilim alsyn degen tilekpen mektepter salynyp jatyr. Ýaqyt tez ótedi. Eger joǵary oqý ornyna túse almasa, bireýdiń úıin tazalap, malyn baǵyp, kóligin aıtyp júresińder. Al jaqsy oqyǵan bala ákim, mınıstr, ǵalym bola alady. Sondyqtan oqyńdar, oqysańdar bári bolady»,- dedi Berdibek Saparbaev.

  Aıta keteıik, Aqtóbe oblysynda úsh aýysymda bilim beretin 24 orta mektep bar. 2017 jyly 31 mekteptiń qurylysy júrip, onyń 11-i paıdalanýǵa berildi. Eki aptada taǵy 4 mektep iske qosylady. Aqtóbe oblystyq bilim basqarmasynyń basshysy Lázzat Orazbaevanyń aıtýynsha, óńirde qabyrǵasy aǵashtan turǵyzylǵan 16, qamystan salynǵan 5 mektep bar. Saman kirpishten qalanǵany - 34.