Berdibek Saparbaev: Naǵyz jemqorlyq qurylys salasyn jaılap alǵan
AQTÓBE. QazAqparat - Aqtóbe qalasynda 14 nysannyń qurylysy uzaq jyldan beri aıaqtalmaı tur. Qonaq úı, avtosalon, turǵyn úılerdiń qurylysy bastalyp, keıin ıesi shetel asyp ketken. Nysandardy keri qaıtarýǵa jergilikti bıliktiń kúshi jeter emes. Qadaǵalaýshy qyzmetkerlerdiń jumysyn synaǵan oblys ákimi Berdibek Saparbaev qurylys salasyn jemqorlyq jaılaǵanyn ashyq aıtty, dep habarlaıdy «QazAqparat» tilshisi.
Aqtóbe oblysyndaǵy «saqaldy qurylystardyń» jumysy áli turalap tur. Qalanyń ortalyq kóshesindegi «Kosmos» qonaq úıiniń ıesin zań aıasynda jazalaımyz dep oılaǵan oblystyq memlekettik sáýlet-qurylys baqylaý basqarmasy ony ýysynan shyǵaryp aldy. Qurylys ıesi shetel asyp ketken.
«14 nysan áli kúnge deıin toqtap tur. Teń jartysynda qujattary joq. Derekterge qarasam, jer telimi qaı jyly berildi, qurylys qashan bastaldy degen suraqtarǵa jaýap berilmegen. Osydan 10 jyl buryn bastalǵan qurylys bitý qajet edi. Nege quqyq qorǵaýshylarǵa, prokýratýraǵa barmaımyz? Eger qurylys ondaǵan jylǵa sozylsa, ne úshin oǵan jobalyq-smetalyq qujat, saraptama jasaıdy. «Kosmos» qonaq úıin qara dedim. Sender óıtip-búıtip júrgende ıesi qashyp ketti. Bitti, barlyǵyń jınalǵanmen, taba almaısyńdar. Bir áıel ustaldy, iske qatysy joq. Ol túrmede otyr, túgi de joq. Bárin bilemiz.
Sender uıyqtap otyratyn bolsańdar, solaı bolady»,- dedi oblys ákimi Berdibek Saparbaev.
2016 jyly Aqtóbede qurylys qyzmetiniń sapasyn baqylaý maqsatynda jospardan tys 190 tekserý júrgizildi. Nátıjesinde 108 sýbekt ákimshilik jaýapqa tartylyp, 21 mıllıon teńge aıyppul salyndy. Oblystyq memlekettik sáýlet-qurylys baqylaý basqarmasynyń basshysy Berdııar Pirimbetovtiń aıtýynsha, óńirde jylyna 40-50 mıllıard teńgeniń qurylysy júrgiziledi eken. Eseptegende salynǵan aıyppul kóleminiń tym az ekeni anyq. Basqarma basshysy shaǵyn jáne orta bıznesti tekserýge ruqsat joq ekenin alǵa tartty. Degenmen, ereje boıynsha qurylys mamany kez kelgen jumystyń sapasyn baqylaýǵa múmkindigi bar.
«Nege úıler qulap jatyr? Sebebi, tehnıkalyq, avtorlyq qadaǵalaý qyzmeti júrgizilmegen, jobalyq-smetalyq qujattaǵy talaptardyń barlyǵy pysyqtalmaǵan. Eki jaýapty qyzmetker kúnde qurylys basynda júretin bolsa, úıler qulamas edi. Meniń oıymsha, naǵyz jemqorlyq osy jerde. Barlyǵy kelisip alǵan. Tapsyrys berýshi, merdiger, jobalaýshy, saraptamashy. Tehnıkalyq, avtorlyq qadaǵalaýshylar jalaqy alǵanda aıyna bir ret qurylys jumystarymen tanysyp, alǵanyna máz bolyp júredi»,- dedi oblys ákimi Berdibek Saparbaev.
«Keıin qazaqsha aıtqanda, «ákesin tanytyp» aıyppul salsa, olar eshteńe isteı almaıdy. Seniń aıyppulyń 40-50 myń teńgeden aspaıdy. Qaltasynan ursa, olar jumys isteıdi» dep kemshilikterdi joıý úshin naqty tapsyrma berdi ákim.
Altynaı Saǵyndyqova
