Berdibek Saparbaev Moıynqumda joǵalǵan balany tapqan turǵyndy marapattady

TARAZ. QazAqparat – Jambyl oblysynyń ákimi Berdibek Saparbaev Shý men Merki aýdandary aýmaǵynda júrip jatqan «Qarasora - 2020» jedel aldyn alý sharasynyń barysymen tanysty. Qos aýdanda kannabıoıdti esirtki zattarynyń kózi – jabaıy qarasoranyń keń alqaby oryn tepken, dep habarlaıdy QazAqparat tilshisi.

Sharaǵa oblys prokýrory Nurǵalym Ábdirov, UQKD basshysy Marat Irmenov, Polıtsııa departamentiniń bastyǵy Janat Súleımenov qatysty.

Keńes zamanynda Shý alqabynan paıda tappaq bolǵandar elimizdiń ár túkpirinen aǵylatyn. Biraq, Shýǵa qaraǵanda Merki aýdanynda qarasora alqabynyń aýmaǵy anaǵurlym úlken bolyp keledi. Atap aıtqanda, Shý aýdanynda – 24,4 myń gektar, Merkide – 85,7 myń gektar. Sondyqtan dál osy eki aýdannyń oblys ákimi men quqyq qorǵaý organdary basshylarynyń nazaryn aýdartqany tegin emes. Tikushaq aldymen «Tasótkel» ýchaskesine aıaldady. Munda ishki ister organdarynyń ardageri Shopyrhan Japabaev aýmaqtaǵy qarasora alqabyna qatysty jaǵdaıdy baıandap berdi.

Keıin esirtkimen kúres jónindegi aýdanaralyq «Delta Dolına» bóliminiń aldynda aımaq basshysy Berdibek Saparbaev sóz aldy.

«Memlekettiń basty mindeti – azamattardyń qaýipsizdigin qamtamasyz etý. Memleket basshysy Qasym-Jomart Toqaev Qazaqstan halqyna Joldaýynda bul baǵytqa erekshe nazar aýdarǵan edi. Prezıdent qyzmet babynda azamattarmen tikeleı jumys isteıtin ýchaskelik ınspektorlardyń rólin erekshe atap ótken bolatyn. Prezıdenttiń tapsyrmasy bar, biz ony oryndaıtyn bolamyz. Qazirgi kezde barlyq ýchaskelik ınspektorlar kólikpen qamtamasyz etilgen. Aǵymdaǵy jyldyń sońyna deıin 21 polıtsııa qyzmetkeriniń turǵyn úı máselesin

sheshemiz. Tirek pýnktteriniń shtattyq sanyn arttyrýdy josparlap otyrmyz. Sizderge qoǵam ıgiligi jolyndaǵy qajyrly eńbekterińiz úshin alǵysymdy bildirgim keledi», - dep atap ótti Berdibek Mashbekuly.

Budan soń oblys ákimi «Úzdik ýchaskelik polıtsııa ınspektory» jáne «Úzdik ýchaskelik polıtsııa beketi» oblystyq konkýrstarynyń jeńimpazdaryn marapattap, Sarysý aýdandyq polıtsııa bóliminiń qyzmetkerleri Rýslan Musaevqa jáne Qordaı aýdandyq polıtsııa bóliminiń qyzmetkerleri Saıat Súleımenge «Nıva» jańa qyzmettik avtokólikterin tabystady. Ár aýdan men oblys ortalyǵynyń úzdik ýchaskelik ınspektorlary da jańa kóliksiz qalǵan joq. Óńir basshysy barlyǵy 12 avtokóliktiń kiltin tapsyrdy desek, oǵan ıe bolǵandardyń qatarynda «Delta Dolına» esirtki qylmysyna qarsy is-qımyl jónindegi aýdanaralyq bóliminiń ujymy da bar.

Aǵymdaǵy jyly polıtsııa avtoparki 100 jańa avtokólikpen tolyqty.

Taǵy bir aıta keter jaıt, sońǵy eki kúnde oblys turǵyndary ǵana emes, búkil Qazaqstan bolyp Moıynqum aýdanynda joǵalǵan jeti jasar balany izdestirý sharalaryna barynsha alańdaýshylyq tanytqany belgili. Joǵalǵan bala Moıynqum aýylynyń turǵyny, ishki ister organdarynyń ardageri Ermurat Spanovtyń kómegimen tabyldy.

«Polıtsııa departamenti izdestirý sharalaryn aýqymdy túrde uıymdastyra bildi. Barsha Qazaqstan bolyp joǵalǵan balany taǵdyryna alańdaǵan edi. Sizge úlken rahmet», - degen oblys ákimi alǵysyn bildirip, ardagerge qol saǵat syılady.