Berdibek Saparbaev merzimi keshikken qurylys-jóndeý jumystaryn synǵa aldy
TARAZ. QazAqparat – Jambyl oblysynyń ákimi Berdibek Saparbaev Baızaq aýdanyna jumys sapary barysynda jóndeý-qurylys jumystarymen tanysty, dep habarlaıdy QazAqparat tilshisi.
Aımaq basshysy aldymen aýdandaǵy Qostóbe aýylyna at basyn burdy. Ondaǵy orta mektep janynan «Aýyl - el besigi» baǵdarlamasy aıasynda sport zal, májilis zaly, úsh oqý kabenti men ashanany qamtıtyn qosymsha ǵımarat salynýda. Bas merdiger «Taraz Irrıgatsııa» JShS nysandy bıyl tamyzda paıdalanýǵa berýi kerek bolatyn. Merzimnen keshikkeni úshin kásiporynǵa 3 mln teńge aıyppul salyndy. Tapsyrý merzimi 18 qarashaǵa sozyldy.
«Qurylys ekinshi aıǵa sozylýda, al oqý jyly áldeqashan bastalǵan. Jaqynda ekinshi toqsanǵa aıaq basamyz. Jumystardy jedeldetip, ekinshi toqsan bastalǵanǵa deıin aıaqtaý qajet. 1 qarashaǵa deıin nysan tapsyrylýy tıis», - dedi oblys ákimi.
B.Saparbaev jospardan tys Qostóbe aýylyndaǵy Áýlıeata men Qonaev kóshelerine at basyn burdy. Bul kóshelerde úsh aıdan beri joldar, trotýarlar men aryqtardyń qurylysy júrip jatyr. Bul jumystardyń jalpy quny 2,1 mlrd teńgeni quraıdy.
«Jumys tym uzaqqa sozyldy. Men eki aı buryn osynda bolǵan kezben salystyrsam ózgeris kóp emes. Bul óte qymbat joba, muny qabyldaýda óte muqııat bolyńyzdar. Bıyl aýdan turǵyndarynyń áleýmettik mańyzdy máselelerin sheshýge bıýdjet qarajatynan 12,9 mıllıard teńge bólindi. Degenmen keıbir jobalardy júzege asyrý merzimderi keshiktirilýde. Keler jyly qarajatty bólý kezinde bıýdjet aqshasyn barynsha tıimdi paıdalanatyn aýdandarǵa basymdyq beriletinin eskerińizder», - dedi óńir basshysy aýdan ákimi Nurjan Nurjigitovke qarata.
Al, Býryl aýylynda «Aýyl - el besigi» baǵdarlamasy aıasynda dene shynyqtyrý-saýyqtyrý kesheni salynýda. Munda gımnastıkalyq jáne oıyn zaldary bolady. Jobanyń quny 349 mıllıon teńgeni quraıdy. Merdiger «Taraz qurylys Dızaın» nysandy aǵymdaǵy jyldyń qazan aıynyń sońyna deıin tapsyrýdy josparlap otyr. Berdibek Saparbaev ákimshilik úı-jaılardy qysqartý arqyly sport zaldarynyń aýmaǵyn barynsha keńeıtýdi tapsyrdy.
Oǵan jaqyn mańda 180 oryndyq Mádenıet úıi boı kóterýde, ol da qazan aıynyń sońyna deıin tapsyrylmaq. Oblys ákimi merdigerler ǵımarattyń ishki qurylysyna ǵana emes, qasbettiń bezendirilýine de jaýapkershilikpen qaraý kerektigin atap ótti. Jergilikti Jeńis saıabaǵynda da abattandyrý jumystary bastalypty. Bul jumystar aǵymdaǵy jyldyń qarasha aıyna deıin aıaqtalatyn bolady.
Sondaı-aq, Túımekent orta mektebindegi kúrdeli jóndeý aıaqtalýǵa jaqyn. Qazir eńbek sabaqtaryna arnalǵan sheberhanany jóndelip jatyr. Al demeýshi esebinen kıim sheshetin oryn salynýda. Sondaı-aq, demeýshilik qarajatqa mektep aýmaǵynyń bir bóligin asfalttaý josparlanyp otyr.
