Berdibek Saparbaev Merki aýdandyq aýrýhanasyn tekseretin arnaıy komıssııa qurdy
TARAZ. QazAqparat – Jambyl oblysynyń ákimi Berdibek Saparbaevtyń tapsyrmasyna sáıkes Merki aýdandyq aýrýhanasynyń jumysyn arnaıy komıssııa tekseretin boldy. Atalǵan komıssııany oblys ákiminiń orynbasary Erjan Jylqybaev basqarady, dep habarlaıdy QazAqparat.
Jambyl oblysy ákiminiń áleýmettik salalarǵa jetekshilik etetin orynbasary Erjan Jylqybaev Merki aýdandyq aýrýhanasynyń medıtsına qyzmetkerleriniń shaǵymdary boıynsha keshendi tekserý sharalaryn júrgizetin arnaıy komıssııany basqarady.
«Atalǵan komıssııa quramyna taýarlar men kórsetiletin qyzmetterdiń sapasy men qaýipsizdigin baqylaý departamentiniń, prokýratýra organdarynyń, oblys ákimi apparatynyń qyzmetkerleri, qoǵam men kásipodaq uıymdarynyń ókilderi engen. Komıssııanyń basty mindeti – medıtsına qyzmetkerleriniń shaǵymdaryndaǵy barlyq aıtylǵan faktilerdi obektıvti jáne ádil sheshý, emdeý mekemesi qyzmetkerleriniń quqyqtaryn buzýǵa jol bermeý boıynsha naqty sharalar qabyldaý», - delingen oblys ákiminiń baspasóz qyzmetiniń habarlamasynda.
Sondaı-aq, habarlamada eger keltirilgen faktiler rastalǵan jaǵdaıda, oǵan kináli barlyq laýazymdy tulǵalar tıisti jazaǵa tartylady. Tekserý is-sharalarynyń qorytyndysy jurtshylyq nazaryna usynylmaq.
Eske salaıyq, Jambyl oblysynyń Merki aýdanynda koronavırýs juqtyrǵan dárigerdiń shaǵymy boıynsha tekserý bastalǵan bolatyn.
Budan bólek, Nur Otan partııasy jeke tekserý júrgizip, qorytyndysynda aýdan ákiminiń orynbasary men bas dáriger jazalandy.
