Berdibek Saparbaev memlekettik baǵdarlamany paıdalanbaıtyn ákimderdi synǵa aldy
Otyrys jumysyna oblys ákimi Berdibek Sapabaev, QR Parlamenti májilisiniń, qalalyq jáne oblystyq máslıhattardyń depýtattary, barlyq deńgeıdegi ákimder qatysty.
Esepti kezeń ishinde memleket basshysynyń ekonomıkanyń 5 paıyzdyq ósimine qol jetkizý tapsyrmasy oryndalǵan.
Oblys ákiminiń orynbasary Oljas Smaǵulovtyń aıtýynsha, óńdeý ónerkásibiniń ósimi - 5,1%, aýyl sharýashylyǵy - 4,7%, qurylys - 8,8% quraǵan. Bıyl paıdalanýǵa berilgen turǵyn úıdiń aýmaǵy ótken jylǵy osy kezeńmen salystyrǵanda 13,9%-ǵa kóp.
Shaǵyn jáne orta bıznes sýbektileri 5,6% kóbeıdi. 9,6 myń jumys orny quryldy. Negizgi kapıtalǵa túsetin ınvestıtsııa kólemi 190 mlrd teńgeni qurap, 10,6% ósken.
- Biz Prezıdent tapsyrmasyn tolyqtaı oryndadyq. Bıylǵy negizgi áleýmettik-ekonomıkalyq kórsetkishter byltyrǵydan joǵary. Qolda bar qor men áleýetti eskere otyryp, jyl sońyna deıin osy qarqyndy saqtaımyz dep senemin, - dep atap ótti oblys ákimi.
Osy jyly óńir ekonomıkasyna bıýdjet qarajatynan tys 32 mlrd teńge (2017 j. - 29 mlrd teńge) tartý, jalpy somasy 56 mıllıard teńgege memlekettik-jeke menshik áriptestik pen bıznestiń áleýmettik jaýapkershiligi aıasynda 128 jobany júzege asyrý kózdelgen.
Oblys ákimi qol astyndaǵylardy óńirdiń sońǵy alty aı ishindegi damýyna súıene otyryp, kemshiliktermen jumys júrgizýge shaqyrdy.
Ásirese memlekettik-jeke menshik áriptestik pen aýyl sharýashylyǵyn damytý úshin memlekettik baǵdarlama múmkindikterin paıdalanbaıtyn aýyl ákimderi synǵa ushyrady.
- Ótken jyldyń sońynda biz jumystyń tıimdiligin kóterý qajettigin aıtqan bolatynbyz. Ókinishke qaraı, budan bári birdeı durys nátıje shyǵarǵan joq. Memlekettik baǵdarlamalarmen jumys istemeıtin aýyldyq okrýg ákimderiniń atqaratyn qyzmetine sáıkestigin qarastyrý kerek, - dep tapsyrdy óńir basshysy Berdibek Saparbaev.
