Berdibek Saparbaev qytaılyq kompanııalardy kelisimshart mindetterin oryndaýǵa shaqyrdy
BEIJІŃ. QazAqparat - Aqtóbe oblysynyń ákimi Berdibek Saparbaev Qytaıǵa jumys sapary kezinde KazakhstanPotashCorporation kompanııasynyń basqarma tóraǵasy Chjan Tszıýnmen kezdesti, dep habarlaıdy QazAqparattyń Qytaıdaǵy tilshisi.
Aqtóbe oblysynyń ákimi Berdibek Saparbaev Qytaıda jumys saparymen júr. Ekijaqty kezdesý kezinde «Batys Kalıı» JShS-men birlesip kalıı tyńaıtqyshyn óndirý zaýytyn salý jónindegi máseleler talqylandy.
«Eki jyl buryn Aqtóbe oblysyna kalıı tyńaıtqyshyn shyǵaratyn zaýyt salý týraly kelisim bolǵan edi. Sizder bul jobany 10 jyldan beri josparlap kelesizder. Ókinishke qaraı, alǵa jyljý joq. Ótken jyldan beri tıisti mınıstrliktermen ken oryndaryn ıgerýshilerdiń kelisimshartty oryndaýyn tekserip, baqylap otyrmyz. Kelisimshartty oryndamaǵan ken ornyn ıgerýshilerge qatań shara qoldanylady, tipti kelisimshart buzylady. Sondyqtan nájıje bolmasa, biz mınıstrlikke kelisimdi buzý týraly usynys aıtamyz. Resýrstardy ıgerýge qarjysy men tehnologııasy jetetin basqa kompanııalarǵa basymdyq beremiz», - dedi Aqtóbe oblysynyń ákimi Berdibek Saparbaev.
Óńir basshysy kelisimshart aıasynda KazakhstanPotashCorporation kompanııasy jyl saıyn áleýmettik qajettilik úshin bıýdjetke 50 myń dollar tóleýi tıis ekenin eske saldy.
«Ókinishke qaraı kúni búginge deıin bir tıin aýdarylǵan joq. Bul kompanııa kelisimshart talaptaryn oryndamaı otyr», - dep atap ótti ákim.
Aqtóbe oblysynyń ákimi Berdibek Saparbaev zaýyt qurylysy kezinde Qazaqstan zańnamalaryndaǵy ekologııalyq talaptardy saqtaýyn basty nazardy ustaýdy tapsyrdy. KazakhstanPotashCorporation qytaılyq kompanııasynyń basqarma tóraǵasy Chjan Tszıýn Aqtóbe oblysynyń ákimi Berdibek Saparbaevtyń suraqtary men usynystaryna jaýap berdi. Onyń aıtýynsha, jobany aldyn ala baǵalaý jáne qajetti zertteý jumystaryn júrgizýge kóp ýaqyt jumsalǵan.
«Jumys toqtatylǵan joq. Qazaqstannyń qorshaǵan ortany qorǵaý talaptaryna saı bolýy úshin biz kalıı tuzyn óndirýge munaı sektorynda qoldanylyp jatqan zamanaýı tehnologııany paıdalanamyz. Bul ekologııalyq jaǵynan eń tıimdi tásil bolady. Jobanyń sátti iske asatynyna senimdimin»,- dedi ol.
Eki jaq kalıı tyńaıtqyshyn óndirý tehnologııasyn jan-jaqty talqylady. Sonymen qatar, daıyn ónimniń ózindik qunyn tómendetý máselesi qozǵaldy. Qytaılyq mamandar 2018 jyldyń alǵashqy jartyjyldyǵynda kelip, jańa tehnologııalardy engizý joldaryn talqylaıdy. Sonymen qatar, Aqtóbe oblysynyń ákimdigi KazakhstanPotashCorporation kompanııasyna áleýmettik jobalardyń naqty tizimin jasap beredi. Aldaǵy 10 jylda qytaılyq kompanııa Aqtóbege 500 myń dollar salýy tıis.
Chjan Tszıýn QazAqparat tilshisine bergen suhbatynda Berdibek Saparbaevpen aradaǵy kelisim sátti bolǵanyn málimdedi.
«Bir beldeý, bir jol» jobasy Qazaqstan men Qytaı arasyndaǵy yntymaqtastyqty nyǵaıtýǵa septigin tıgizdi. Búgin biz ashyq dıalog alańynda Aqtóbe oblysyna kalıı tuzy zaýytyn salý máselesin talqyǵa salǵan bolatynbyz. Meniń oıymsha birlesken joba eki elge tıimdi, paıdaly bolady», - dedi Chjan Tszıýn.
Aıta keteıik, Qazaqstanda kalıı tuzynyń 6 mıllıard tonna qory bar. Kalıı qorynyń basym bóligi elimizdiń batys óńirinde ornalasqan. Sonymen qatar, 4 mıllıard tonna fosfat qory bar. Qazaqstan men Qytaı arasyndaǵy kelisim elimizdi kalıı tuzyn óndirýshilerdiń qataryna qosyp, úzdik eksporttaýshylar tizimine engizedi.
