Berdibek Saparbaev koronavırýspen kúreske barlyq resýrsty jumyldyrýdy tapsyrdy
TARAZ. QazAqparat – Jambyl oblysynyń ákimi Berdibek Saparbaev barlyq qarjylyq jáne ınfraqurylymdyq resýrstardy jumyldyrýdy tapsyryp, qaýipti ınfektsııa órshı túsken jaǵdaıda barynsha daıyn bolýǵa shaqyrdy, dep habarlaıdy QazAqparat tilshisi.
Oblystyq jedel shtabtyń kezekti otyrysynda Densaýlyq saqtaý basqarmasynyń basshysy Áset Qalıev medıtsınalyq mekemeler 100 paıyz daıyn ekenin aıtty.
Oblysta 2530 tósek-oryn jasaqtalǵan, onyń 253-i jansaqtaý bólimine tıesili. Medıtsınalyq mekemelerde ókpeni jasandy jeldetýge arnalǵan 253 qural, 706 ottegi ballony, 542 ottegi kontsentratory, 1009 ımpýlstik oksımetr, 19 tsıfrlyq rentgen apparaty, 10 kompıýterlik jáne 7 magnıttik-rezonanstyq tomograf bar. Jaqyn arada taǵy 74 ÓJJ, jeti kompıýterlik tomograf, tórt tsıfrlyq rentgen apparaty, tórt ottegi stantsııasy, sondaı-aq 74 birlik jedel-járdem kóligi, segiz jyljymaly medıtsınalyq keshen, 100 kópfýnktsıondy tósek jetkiziledi dep kútilýde.
Berdibek Saparbaev barlyq reanımatsııalyq tósekterdi ÓJJ apparatymen qamtamasyz etýdi tapsyrdy.
Oblystyń bas dárigeri ambýlatorııalyq deńgeıde de, statsıonarlyq deńgeıde de dári-dármektiń jetkilikti qory bar ekenin jetkizdi.
Jalpy, 4 410 medıtsına qyzmetkerin tartý josparlanyp otyr. Onyń ishinde 882 dáriger, 1764 orta býyn medıtsına qyzmetkerleri jáne sonsha kishi býyn medıtsına qyzmetkerleri bar. Oblys ákimi men S.D.Asfendııarov atyndaǵy Ulttyq medıtsınalyq ýnıversıtetiniń rektory arasynda jasalǵan yntymaqtastyq týraly memorandým aıasynda qosymsha 150 maman tartylmaq.
Óńirde jeti PTR zerthanasy bar. Mindet – zerthanalyq zertteýlerdiń tıimdiligin, PTR zerthanalarynyń sany men syıymdylyǵyn arttyrý.
Oblys ákimi áli de mobıldi toptardyń jumysyna kóńili tolmaıtyndyǵyn jetkizdi.
«Ókinishke oraı, koronavırýstyq ınfektsııa qaýpi áli joıylǵan joq. Biz naqty jáne dáıekti túrde áreket etýimiz kerek. Turǵyndar nemquraılylyq tanytqan saıyn, koronavırýsty jeńý múmkin emes. Halyq úılený toılary men mereıtoılardy ótkizýdi toqtatpaı otyr. Mundaı faktilerdi anyqtaýy tıis mobıldi toptar eshqandaı mardymdy shara qoldanyp jatqan joq, reıdterdi tek esep úshin júrgizýde», - dedi oblys ákimi.
Berdibek Saparbaev kezdesýge qatysqan dárihana jelileri ókilderin jaǵdaıdyn kez-kelgen baǵytta órshýine daıyn bolý kerektigin, týyndap otyrǵan máseleler týraly ashyq aıtýǵa shaqyrdy.
