Berdibek Saparbaev Qordaıdaǵy qoǵamdyq-saıası ahýal týraly aıtty
Óńir basshysy Qordaı aýdanynda bolǵan jaǵdaı turǵyndardy áli de tolǵandyryp júrgenin jetkizdi.
«Birinshiden, qazir bul aýdanda áleýmettik, qoǵamdyq-saıası jaǵdaı turaqtaldy. Barlyq másele baqylaýda. Memleket basshysynyń tapsyrmasy boıynsha qurylǵan jumys toby barlyq máseleni baqylaýǵa alyp, qabyldanǵan is-sharalar josparyna sáıkes jumys júrip jatyr. Qazirgi tańda biz zardap shekken azamattarǵa demeýshilerdiń esebinen 44 mıllıon teńge kóleminde kómek berdik», - dedi B.Saparbaev.
Qordaı aýdanynda ortasha dárejede zaqym kelgen barlyǵy 110 úı qalpyna keltirildi.
«Qazir qalǵan 39 turǵyn úı men 20 kommertsııalyq nysandy jóndep jatyrmyz. Qaıta qalpyna keltirý jumystaryn osy jyldyń tamyzynda aıaqtaý josparlanyp otyr. Oǵan qosymsha, qazirgi tańda indetpen qatar kelgen daǵdarysqa baılanysty memleket tarapynan jumyspen qamtý, áleýmettik nysandardy jóndeý, salý jóninde qolǵa alynyp jatqan aýqymdy sharalar aıasynda Qordaı aýdanynyń ózinde júzden astam jobany júzege asyrýǵa 20,5 mıllıard teńge qarjy bólindi. Bul qarjy negizinen zardap shekken Qarakemer, Masanchı, Sortóbe, Bular batyr, Aýqatty aýyldaryna mektep, sport, mádenıet nysandaryn salýǵa, joldardy jóndeýge, aýyz sý, jaryq jáne gazben qamtamasyz etýge jumsalmaq», – dedi B.Saparbaev.
Brıfıng sońynda Berdibek Saparbaev áleýmettik jeli arqyly kelip túsken turǵyndardyń suraqtaryna jaýap berdi. Óńir basshysy barlyq talaptar saqtalatyn bolsa, oblys ortalyǵynda qoǵamdyq kólikterdiń qozǵalysyna tańerteń, túste jáne keshke ruqsat beriletinin atap ótti.
Ol bul máseleniń qaralatynyn jetkizdi. Sondaı-aq oblys ákiminiń aıtýynsha, bazar adam kóp shoǵyrlanatyn aýmaq bolǵandyqtan, onda vırýstyń taralý múmkindigi joǵary. Sol sebepti qatań sanıtarlyq talaptar saqtalatyn kezde ǵana, barlyq jaýapkershilikti bazar basshylyǵy óz moınyna alyp, saqtyq, tártip, tazalyq sharalaryna muqııat mán beretin bolsa, ol nysandardyń jumysyn jandandyrý aldaǵy shtab otyrysynda saralanatyny aıtyldy.
Eske salaıyq, 7 aqpan kúni Jambyl oblysy Qordaı aýdanyndaǵy Masanchı aýylynyń turǵyndary arasynda jappaı tóbeles boldy. QR Prezıdenti Qasym-Jomart Toqaev buzaqylyq sıpattaǵy tártipsizdikti arandatýshylar óz paıdasyna qoldanbaq bolǵanyn málimdedi.
Úkimettik komıssııa quryldy, Bas prokýratýraǵa, Ulttyq qaýipsizdik komıtetine tıisti tapsyrmalar berildi.
Tártipsizdikter keıin Qordaı, Aýqatty, Sortobe eldi mekenderinde de boldy.
Málim etilgendeı, janjalǵa basqa aýyldardan kelgen 300-den astam adam qosylǵan. Eki jaq bir-birine tas laqtyryp, taıaqpen uryp, qarý qoldanǵan. Oqıǵa ornynda 8 adam, aýrýhanada 2 adam kóz jumdy.
9 aqpan kúngi málimet boıynsha, medıtsınalyq kómekke 165 adam júgingen. Turǵylyqty jeri boıynsha medıtsınalyq uıymdarǵa - 140 adam, Qyrǵyzstandaǵy medıtsınalyq uıymǵa - 25 adam jetkizildi. «Qazaqstandaǵy aýrýhanaǵa jatqyzylǵandardyń ishinde turaqty aýyr jaǵdaıda 30 adam, al asa aýyr jaǵdaıda 8 adam bar. Qaıtys bolǵandardyń sany – 10. Oqıǵa ornynda 8, al taǵy 2 adam medıtsınalyq mekemede qaıtys boldy. Qazirgi tańda áli 8 adam jansaqtaý bóliminde jatyr», - dedi Densaýlyq saqtaý vıtse-mınıstri Lázzat Aqtaeva.
Janjaldarǵa qatysy bar degen kúdikpen 47 adam ustal yp, polıtsııa bólimine jetkizildi. Olardan eki ańshy qarýy tárkilendi. Keıin olardyń 44-i bosatyldy.
QR ІІM málimetinshe, Qordaıdaǵy jappaı tártipsizdik kórshiles eki aýyl turǵyndary arasynda bastalǵan.
10 aqpanda QR Prezıdentiniń Jarlyǵymen Berdibek Saparbaev Premer-Mınıstrdiń orynbasary qyzmetin bosatylyp, Jambyl oblysynyń ákimi bolyp taǵaıyndaldy.
18 naýryzda oqıǵaǵa qatysy bar 3 adamǵa sot úkimi shyǵyp, olardyń árqaısysyna 1,5 jyldan bas bostandyǵynan aıyrý jazasy taǵaıyndaldy.
QR Bas prokýratýra 27 naýryzda málim etkendeı, Jambyl oblysynda, Almaty jáne Shymkent qalalarynda Qordaıdaǵy jappaı tártipsizdikke belsendi qatysýshylardy ustaý boıynsha arnaıy operatsııa júrgizildi. Onyń nátıjesinde 25 adam ustaldy. Olardyń ishinde qazaqtar, dúngender, qyrǵyzdar bar. Onyń 7-eýi buryn sottalǵan.
29 sáýirde tártipsizdikke qatysqany úshin ustalyp, Almaty qalasynyń tergeý ızolıatoryna qamalǵan taǵy bir kúdikti óli kúıinde tabyldy.
Jambyl oblysynyń Qordaı aýdanynda ultaralyq tatýlyq pen kelisimdi saqtaý jáne nyǵaıtýǵa baǵyttalǵan «Beıbitshilik pen kelisim» atty jańa joba qol alyndy.
