Berdibek Saparbaev «Qordaı Agro-2020» JShS-niń jumysymen tanysty
TARAZ. QazAqparat – Jambyl oblysynyń ákimi Berdibek Saparbaev «Qordaı Agro 2020» JShS ókilderimen kezdesip, onda keler jylǵa arnalǵan josparlar barysy saralandy,-dep habarlaıdy QazAqparat tilshisi.
Berdibek Saparbaev agrarlyq salanyń óńir ekonomıkasynda aıryqsha ról atqaratynyn atap ótip, onyń qarqyndy damýy úshin zamanaýı tamshylatyp sýarý tehnologııalaryn engizýdiń mańyzdylyǵyna toqtaldy.
«Qordaı Agro 2020» JShS dırektory Alı Sılıýk aımaq basshysynyń oıymen tolyq kelisetinin bildirdi. Ol óz sharýashylyǵyna tamshylatyp sýarý júıesin engizgen desek, endi basqa da jańa tehnologııalardy qoldanýǵa nıetti.
Bıyl 200 gektar jerge qant qyzylshasyn otyrǵyzý josparlanǵanymen, karantındik shekteý sharalaryna baılanysty jospardy júzege asyrý múmkin bolmaǵan. Júgerige - 100 ga, kúnbaǵysqa - 20 ga, qulpynaıǵa - 10 ga jer qarastyrylǵan.
Keler jyly seriktestik egin alqaptaryn keńeıtpek. Qordaı aýdanyndaǵy 500 gektar aýmaqta sharýalar qant qyzylshasyn, júgeri, qulpynaı ósirýdi josparlap otyr. Al Baızaq aýdanynda qant qyzylshasy, júgeri men qulpynaı otyrǵyzýǵa 200 gektar berilmek.
Berdibek Saparbaev qazirden bastap sýarýǵa qajetti sý, kerekti aýyl sharýashylyǵy tehnıkasymen qamtý máselesin sheshý kerektigine mán berdi.
Alı Sılıýk jemis jáne kókónis klasterine jańa tehnologııalar engizýge yntaly. Ol úshin tabıǵattyń ózi jaıly jaǵdaı jasady deıdi. Jambyl oblysynda kún jyly, jer qunarly. Aımaqta áli de jańa skvajınalardy tabý múmkindigi joǵary.
Aımaq basshysy atalǵan bastamalardyń júzege asýyna oblys ákimdigi de múddeli ekenin jetkizdi. «Qajetti qoldaýdan taryqpaısyzdar», dep ýáde berdi Berdibek Saparbaev.
