Berdibek Saparbaev kópóqabatty úıler irgesindegi dúkenderge tosynnan kirip, baǵany tekserdi
«Jaılaý» jáne «Aqbulaq» móltek aýdandarynda ornalasqan shaǵyn dúkenderge bas suqqan aımaq basshysy nan, sút, kúrish, qaraqumyq, sábiz, kartop, pııaz jáne taǵy basqa taýarlardyń qanshadan jetkiziletinin, tutynýshylarǵa qanshadan satylatynyn surady.
Jalpy, saýda qyzmetin retteý týraly zań áleýmettik mańyzy bar azyq-túlik taýarlaryna shekti saýda ústeme baǵasyn belgileýdi kózdeıdi. Ol 15 paıyzdan aspaýǵa tıis. Atalǵan dúkenderdegi birqatar taýarlar boıynsha joǵarydaǵy zań talaptary saqtalmaı otyrǵany anyqtaldy. Qosylǵan ústeme aqy 25-30 paıyzǵa deıin jetedi.
Oblys ákimi baǵa retteýde úı irgesinde dúkenderdiń mańyzy zor ekenin, olar boıynsha tereń, naqty taldaýlar júrgizý kerektigin basa aıtty.
«Memleket basshysynyń tapsyrmasyna sáıkes azyq-túlik taýarlarynyń baǵasyn retteý, turaqtandyrý – bizdiń basty mindetimiz. Qala halqynyń basym bóligi kópqabatty turǵyn úılerde turady. Olar kúndelikti qajettilikterin úı irgesindegi osyndaı shaǵyn dúkenderden satyp alady. Baǵaǵa degen kózqarasy osyndaı saýda núktelerine baılanysty qalyptasady. Bizge iri saýda oryndarynan bólek, osyndaı shaǵyn dúkenderdi jiti nazarǵa alyp, jıi tekserý júrgizip otyrý asa qajet. Ásirese, jetkizýshilermen jumys júrgizý kerek. Olar dúkenderge áleýmettik mańyzy bar azyq-túlikterdi qandaı baǵada jetkizip otyrǵanyn zerdeleý qajet, naqty buzýshylyqtar boıynsha sharalar qabyldaýǵa tıispiz», - dedi B. Saparbaev.
Aımaq basshysy kásipkerlik jáne ındýstrıaldy-ınnovatsııalyq damytý basqarmasynyń basshysy Aspandııar Seısebaev pen Taraz qalasynyń ákimi Erjan Jylqybaevqa tıisti mindetter júktep, júıeli jumystar júrgizýdi tapsyrdy.
Aıta ketý kerek, Jambyl oblysynyń turǵyndary baǵanyń negizsiz ósýi, dúkenderde fıskaldy chekterdiń berilmeýi, ónim sapasy, vıtrına men kassadaǵy baǵanyń aıyrmashylyǵy, kótermen saýda uıymdary men iri jelilerdiń baǵa kelisimi boıynsha shaǵymdaryn arnaıy senim telefony (8 7262 - 54 21 38) arqyly jetkize alady.
