Berdibek Saparbaev: Kez kelgen tóbeleske ultaralyq sıpat berýdi qoıý kerek

NUR-SULTAN. QazAqparat – Jambyl obylysynyń ákimi Berdibek Saparbaev óńirdegi ultaralyq qarym-qatynas máselesine jiti nazar aýdarylyp otyrǵanyn málim etti, dep habarlaıdy QazAqparat tilshisi.

«Balalar bala bolǵannan keıin bir-birimen kelispeı, tóbelesip qalýy múmkin. Qazir ondaıǵa «ananyń ulty kim, mynanyń ulty kim?» dep birden qaraımyn. Ol balalar bala bolǵannan keıin bir saǵattan keıin qaıta tatýlasady. Sondyqtan biz osyndaı kishkentaı máselelerge ulttyq qarym-qatynastyń máselesi retinde qaramaýymyz kerek. Qazaq pen dúngen, túrik pen ázerbaıjan tóbelesip qaldy demeýimiz kerek», - dedi Jambyl obylysynyń ákimi Ortalyq kommýnıkatsııalar qyzmetinde ótken baspasóz máslıhatynda.

Sonymen qatar Berdibek Saparbaev kontrabandalyq qylmystarǵa basqa ulttyń ókilderiniń qatysy bar degen pikir de durys emes.

«Árıne, qylmys bar. Qyrǵyz Respýblıkasynan kelip jatqan kontrabanda bar. Ol jerde quqyq qorǵaý organdary, qaýipsizdik departamentiniń qyzmetkerleri talaı adamdardy ustap, talaı qylmystyq isti qozǵady. Ol jumys ary qaraı jalǵasyn tabady. Qylmyskerdiń aty qylmysker. Ony ultyna qarap bólýge bolmaıdy. Ol zańǵa sáıkes jaýap berýi kerek», - dep túıdi Berdibek Saparbaev.

Aıta ketsek, buǵan deıin Berdibek Saparbaev buǵan deıin Qordaıdaǵy oqıǵadan keıin dúngenderdiń kóship jatqany týraly aqparatty joqqa shyǵarǵan bolatyn.