Berdibek Saparbaev: Qazirgi basty másele – Qordaıdaǵy qaýipsizdikti qamtamasyz etý
TARAZ. QazAqparat – Memleket basshysy Qasym-Jomart Toqaevtyń tapsyrmasymen qurylǵan úkimettik komıssııa Qordaı aýdanyndaǵy oqıǵanyń saldaryn joıý jumystaryn júrgizip, Jambyl oblysy aýmaǵyndaǵy qaqtyǵystyń sebebin anyqtap jatyr, dep habarlaıdy QazAqparat tilshisi.
Úkimettik komıssııany Premer-Mınıstrdiń orynbasary Berdibek Saparbaev basqarady.
Eske salsaq, 7 aqpanda Qordaı aýdany Masanchı aýylynda turǵyndar arasynda toptasqan sıpattaǵy tóbeles bolǵan edi. Oqıǵanyń saldarynan 80-nen astam adam medıtsınalyq mekemelerge júginip, 10 adam kóz jumǵan. Qazirgi tańda jansaqtaý bóliminde 7 adam jatyr. Aldyn ala málimetter boıynsha, qaqtyǵys kezinde 30-dan astam jeke úı, 15 saýda nysany men 23 avtokólik zaqymdalǵan. Tártipsizdik kezinde polıtsııa qyzmetkerleri de oqtan jaraqat alǵan. Jambyl oblysy ІІD tergeý bólimi QR QK 293-baby (buzaqylyq) boıynsha sotqa deıingi tergeý amaldaryn júrgizip jatyr.
8 aqpanda Memleket basshysy Jambyl oblysyndaǵy oqıǵaǵa baılanysty málimdeme jasady. Qazaqstan Prezıdenti Qasym-Jomart Toqaev Twitter-de bolǵan oqıǵaǵa túsinikteme berdi. «Jambyl oblysyndaǵy tártipsizdikke kináli adamdar jazalanady» dep jazdy Memleket basshysy.
Jambyl oblysy ákiminiń baspasóz qyzmetinen habarlaǵandaı, 8 aqpanda tústen keıin Qazaqstan Respýblıkasy Premer-Mınıstriniń orynbasary Berdibek Saparbaev basqaratyn Qordaı aýdanyndaǵy oqıǵalardyń saldaryn joıý jónindegi úkimettik komıssııa Jambyl oblysyna kelip jetken.
Komıssııa quramyna Jambyl oblysynyń ákimi A.Myrzahmetov, Eńbek jáne halyqty áleýmettik qorǵaý mınıstri B.Nurymbetov, Qazaqstan halqy Assambleıasy tóraǵasynyń orynbasary J.Túımebaev, Parlament Májilisiniń depýtaty Sh.Hahazov jáne «Qazaqstan dúngenderi qoǵamy» qoǵamdyq birlestiginiń tóraǵasy A.Voıntse kirgen. Sonymen qatar komıssııa quramynda qarjy, ındýstrııa jáne ınfraqurylymdy damý birinshi vıtse-mınıstrleri, aqparat jáne qoǵamdyq damý, ulttyq ekonomıka, densaýlyq saqtaý, bilim jáne ǵylym vıtse-mınıstrleri, ishki ister mınıstriniń, Bas prokýrordyń orynbasary jáne Ulttyq qaýipsizdik komıtetiniń tóraǵasy engen.
«Qordaı aýylynda vıtse-premer aýrýhanaǵa baryp, tóbeles kezinde zardap shekken turǵyndarmen sóılesti, - dep habarlady aımaq basshysynyń baspasóz qyzmetinen. - Bes patsıent jedel járdem kóligimen Almaty qalasyna, bir naýqas Taraz qalalyq aýrýhanasyna jetkizildi. Barlyǵyna qajetti medıtsınalyq kómek tolyq kólemde kórsetilip jatyr. Sodan keıin Sortóbe aýylynyń Mádenıet úıinde komıssııa músheleriniń aqsaqaldarmen kezdesýi ótti».
Qordaı aýdanynyń Masanchı, Sortóbe, Aýqatty jáne taǵy basqa dúngen dıasporasy kóp turady. HІH ǵasyrdyń ekinshi jartysynda Qytaıdaǵy kóterilis kezinde aıaýsyz janyshtalǵan dúngender qysta Tıan-Shannyń qarly taýlary arqyly qazirgi Qazaqstan men Qyrǵyzstan aýmaǵyna ótip ketip, olardy jergilikti halyq qushaq jaıa kútip alǵan.
Sortóbe aýylynda Berdibek Saparbaevpen kezdesýge jınalǵan aqsaqaldardyń aıtýynsha, dúngender Jambyl óńirinde 140 jyldan beri turyp keledi.
«Mundaı qaqtyǵystar eshqashan bolǵan emes, - dep atap kórsetti olar. - Jastardyń bilimine kóp kóńil bólip, jiberilgen qatelikterden qorytyndy shyǵarý kerek».
«Sizderden, qoǵamda bedeli bar aqsaqal retinde turǵyndardan jaǵdaıdy obektıvti túrde anyqtaýǵa kelgenimizdi túsindirýdi suraımyz. Kináliler jazalanady. Barlyq zardap shekkenderge qajetti medıtsınalyq jáne basqa da kómek kórsetiledi. Qazir basty másele - aımaqtaǵy qaýipsizdikti qamtamasyz etý», - dedi jınalǵandardyń aldynda Berdibek Saparbaev.
Brıfıngte úkimettik komıssııa músheleri jýrnalısterdiń suraqtaryna jaýap berip, ary qaraı qandaı jumystardyń atqarylatynyn aıtyp berdi. Qordaı aımaǵynda úkimettik komıssııa Qordaı, Masanchı, Aýqatty, Sortobe eldi mekenderindegi qazirgi jaǵdaımen tanysyp, jergilikti turǵyndarmen, oqıǵadan qaza tapqandardyń otbasylarymen birqatar kezdesý ótkizedi. Zardap shekkenderge baryp, turǵyn úılerdi, áleýmettik jáne kommertsııalyq nysandardy tekseredi. Áleýmettik-ekonomıkalyq jáne gýmanıtarlyq sıpattaǵy máselelerdi sheshý jónindegi sharalardy qabyldaıdy.
Jambyl oblysynyń ákimdigimen birge qaza bolǵandardy jerleýdi uıymdastyrý, keltirilgen zalaldy baǵalaý jáne búlingen múlikti qalpyna keltirý boıynsha jumystar atqarylady.
Qordaıda ótken baspasóz máslıhaty kezinde Jambyl oblysynyń ákimi Asqar Myrzahmetov atap ótkendeı, aldyn-ala málimetter boıynsha, oqıǵaǵa myńǵa jýyq adam qatysqan. Qazirgi ýaqytta ustalǵan 47 adam Qordaı aýdandyq polıtsııasynda. Tártipsizdik kezinde ustalǵan, keıin oqıǵaǵa qatysy joqtyǵy anyqtalǵannan keıin Aýqatty aýylynyń 44 turǵyny qamaýdan bosatylǵan.
«Túngi úshte qosymsha kúsh kelgennen keıin polıtsııa ustaý sharalaryn júrgizý múmkindigine ıe boldy. Tańerteń tóbeleske qatysqan basty adamdar polıtsııanyń kelip jatqanyn kórip, kete bastaǵan. Jaǵdaıdy baqylap qalǵan adamdar quqyq qorǵaý organdarynyń qyzmetkerleriniń nazaryna ilingen», - dedi aımaq basshysy.
Qazirgi ýaqytta jaǵdaı turaqty. Jambyl oblysy ákiminiń baspasóz qyzmetiniń habarlaýynsha, quqyq qorǵaý organdarynyń qyzmetkerleri qoǵamdyq tártipti buzǵandardy anyqtap, ustap jatyr.
