Berdibek Saparbaev Qazaqstandaǵy alǵashqy IT-ýnıversıtettiń stýdentterimen kezdesti

NUR-SULTAN. QazAqparat – QR Premer-Mınıstriniń orynbasary Berdibek Saparbaev Astana IT University-diń pedagogtarymen jáne stýdentterimen kezdesti, dep habarlaıdy QazAqparat.

Kezdesýge QR Tsıfrlyq damý, ınnovatsııa jáne aeroǵarysh ónerkásibi mınıstri Asqar Jumaǵalıev, QR Bilim jáne ǵylym mınıstri Ashat Aımaǵambetov, Nur-Sultan qalasynyń ákimi Altaı Kólginov jáne Nursultan Nazarbaevtyń bilim qorynyń dırektory Dınara Qulybaeva qatysty. Qor Astana IT University-diń quryltaıshysy bolyp tabylady.

Kezdesýde bıyl ýnıversıtet aqparattyq-kommýnıkatsııalyq tehnologııalar, aqparattyq qaýipsizdik, telekommýnıkatsııa, bıznes jáne basqarý sııaqty baǵyttary boıynsha 614 stýdentti qabyldaǵany aıtyldy. Olardyń arasynda «Qazaqstannyń 100 jańa esimine» kiretin Ivan Krepak sııaqty tanymal jastar bar. Start-Up jobalaryna arnalǵan kovorkıng-ortalyq, Open Space stýdentterine arnalǵan dıalog alańy, CISCO, Cyber labs oqý zerthanalary, Project Management IPMA boıynsha halyqaralyq sertıfıkattaý ortalyǵy qonaqtardyń erekshe qyzyǵýshylyǵyn týdyrdy.

«Kez kelgen memlekettiń damýyn jastardyń bilim deńgeıimen baǵalaýǵa bolady. Sondyqtan Táýelsizdiktiń alǵashqy kúninen bastap Tuńǵysh Prezıdent - Elbasy qazaqstandyqtarǵa bilimdi ult bolý mindetin qoıdy. Sizder barlyq álemdik standarttarǵa saı keletin jańa IT-ýnıversıtetiniń alǵashqy stýdentteri atanyp otyrsyzdar. Árbir adam óz eliniń laıyqty azamaty bolý úshin zaman kóshinen qalmaı, otanymyzdyń damýyna úles qosýy kerek», - dedi Berdibek Saparbaev.