Berdibek Saparbaev Qazaq handyǵyna arnap salynǵan skverdi retteýdi tapsyrdy

TARAZ. QazAqparat – Jambyl oblysynyń ákimi Berdibek Saparbaev Taraz qalasynda Qazaq handyǵynyń 550 jyldyǵyna oraı salynǵan «Saraıshyq» skverinde bolyp, nysannyń qazirgi jaǵdaıyna alańdaýshylyq tanytty. QazAqparat bul týraly oblys ákimdiginiń resmı saıtyna silteme jasap habarlaıdy.

Aımaq basshysy shahardaǵy «Astana» shaǵyn aýdanynda, QR Tuńǵysh Prezıdenti parkinde boldy jáne birqatar turǵyn úıdiń qurylysymen tanysty.

Berdibek Saparbaev «Astana» shaǵyn aýdanynda Qazaq handyǵynyń 550 jyldyǵyna oraı salynǵan «Saraıshyq» skveriniń jaı-kúıine kóńili tolmaıtynyn jetkizdi. Qalaǵa kórik beredi dep salynǵan skverdiń kirpishteri qulap, tas tósenishteri mújile bastaǵan. Sýburqaǵy da istemeı tur. Osyǵan baılanysty, qala ákimdigine kemshilikterdi tez arada túzeý tapsyryldy.

Sondaı-aq, osy shaǵyn aýdandaǵy úılerdiń qabyrǵasyna salynatyn sýretter jobasy tanystyryldy.

«Abaı kóshesiniń boıynda Abaı Qunanbaıulynyń, ál-Farabı kóshesine ál-Farabıdiń sýretterin salý kerek. Sonymen birge, bul óńirden shyqqan qanshama belgili tulǵalar bar. Atap aıtsaq, Baýyrjan Momyshuly, Sherhan Murtaza sekildi kóptegen beligili tulǵalardyń, sport sańlaqtary men Olımpıada chempıondarynyń sýretin beıneleýge den qoıǵan abzal», - dedi aımaq basshysy.

Kelesi kezekte Berdibek Saparbaev QR Tuńǵysh Prezıdenti parkinde boldy. Saıabaqta bulaq kózderin ashyp, ondaǵy sý toǵanyn baldyrdan tazartýdy, ashyq aspan astyndaǵy sahna men sol mańaıdaǵy turǵyn úılerdiń sáýlettik kelbetin retke keltirýdi shegelep tapsyrdy.

Budan soń aımaq basshysy oblys ortalyǵyndaǵy tozyǵy jetken kópqabatty turǵyn úıler men birqatar nysandardyń qurylys barysymen tanysty. Jumys sapary Abaı kóshesiniń boıynda ornalasqan úılerdiń jaǵdaıymen tanysýdan bastaldy. Bıyl mundaǵy №132, 128, 123, 121, 117 úılerdiń səýlettik kelbetin qaıta jańǵyrtý jumystary bastalmaq. Ol úshin birkelki eksızdik joba ázirlengen.

Aıta ketý, Taraz qalasynda 1300-den astam kópqabatty úı bar. Solardyń 521-i jóndeýdi qajet etedi. Búginge deıin 270-i jańartyldy. Bıyl 80 úıge «Turǵyn úı kommýnaldyq sharýashylyǵyn jańǵyrtý» baǵdarlamasy aıasynda respýblıkalyq bıýdjetten 3,3 mlrd teńge bólindi. Qazirgi tańda 41 úıge jóndeý jumystary bastalyp ketti.

Sondaı-aq, oblys ákimi №15 shaǵyn aýdanyndaǵy qurylys jumystaryn kórdi. 2017-2019 jyldary bul aýmaqqa jańa turǵyn úıler salýǵa 18,7 mlrd teńge jumsalǵan. Al bıylǵy turǵyn úı qurylysyna 20,2 mlrd teńge qarastyrylǵan.