Berdibek Saparbaev qaıyrymdylyq qorlaryn áleýmettik máselelerdi sheshýde kúsh biriktirýge shaqyrdy
Keńes jumysyna QR Parlamenti Senatynyń depýtaty, Balalardyń quqyqtaryn qorǵaý jónindegi ýákil Sáýle Aıtpaeva, Aqparat jáne qoǵamdyq damý vıtse-mınıstri Juldyz Omarbekova, 23 qaıyrymdylyq qorynyń basshylary, sondaı-aq elimizdiń barlyq óńirleriniń ókilderi qatysty.
Kezdesýdi ashqan Berdibek Saparbaev qaıyrymdylyq qorlarynyń basshylaryna alǵys aıtty.
«Sizderdiń qaıyrymdylyq isterińiz áleýmettik máselelerdi sheshýge, ana men balany, jetim balalardy, múmkindigi shekteýli adamdardy, kóp balaly jáne muqtaj otbasylardy qoldaýǵa eleýli úles qosady. Sizderdiń qyzmetterińiz áleýmettik jaýapkershilik pen eldegi azamattyq qoǵamdy damytýdyń úlgisi bolyp tabylady», - dedi B.Saparbaev.
Keńeske qatysýshylar tájirıbe almasyp, qaıyrymdylyqty damytýdyń, azamattardyń áleýmettik osal sanattaryn qoldaýdyń, memleket pen qoǵamnyń ózara is-qımylynyń ózekti máselelerin talqylady.
Atap aıtqanda, «Sábı» qorynyń prezıdenti Ásel Tasmaǵambetova ákimdikterge «Invataksı» qyzmetin damytýǵa erekshe kóńil bólýdi surady. «Múgedekterge - laıyqty ómir» jobasy aıasynda qor 40 myńnan astam múgedekke «Invataksı» qyzmetiniń tegin qyzmetin kórsetedi.
«Qasıetti jol» qory 2011 jyly quryldy. Eń aldymen, biz toǵyz sábıler úıinde ońaltý bólimshelerin ashtyq, sebebi dál sol jerde túrli dıagnozy bar balalar kóp. Bıyl elordada 50 bala ońaltýdan ótti, olardyń 15-in asyrap aldy, qalǵandary aıaqtaryna turdy. Biz úshin bul úlken jeńis. 2014 jyldan bastap biz Nur-Sultan men Shymkent qalalarynda eki ońaltý ortalyǵyn ashtyq. Búginde 1 677 bala eń úzdik álemdik ádistemeler boıynsha osyndaı kómek alady», - dedi qordyń quryltaıshysy Dınara Zakıeva.
BI Group holdınginiń 3 500 qyzmetkeri men 60 bógde donordy biriktiretin «BI-Juldyzaı» korporatıvtik qaıyrymdylyq qorynyń qyzmeti týraly qor dırektorynyń orynbasary Almagúl Sálimbaeva aıtty. Máselen, ótken jyly qor Almaty, Atyraý qalalarynda medıtsınalyq ońaltý ortalyqtaryn, sondaı-aq Nur-Sultan qalasynda erte ońaltý kabınetin ashty. Jalpy alǵanda, 5 jyl ishinde 4-ten 13 jasqa deıingi 69 bala ózderiniń alǵashqy qadamdaryn jasady. 479 operatsııa, 6527 konsýltatsııa berý jáne qazaqstandyq dárigerlerdi oqytý júrgizildi. «Mentorlyq» baǵdarlamasy boıynsha elimizdiń túrli óńirlerinen kelgen 288 hırýrg úshin 70 sheberlik sabaǵy ótkizildi jáne 8 myńnan astam bala ońaltý is-sharalarynyń kesheninen ótti.
Senator S. Aıtpaeva qaıyrymdylyq qorlarynyń basshylaryna alǵysyn bildirip, osy jumystyń odan ári damýyna nazar aýdardy.
«Qazaqstanda jyl saıyn qaıyrymdylyqtyń jaqsy úlgileri artyp keledi, osy rette jekelegen qorlardyń erekshe rólin atap ótken jón. Sizderde azamattarǵa áleýmettik qyzmet kórsetýdiń úlken tájirıbesi bar. Mınıstrliktiń dıalog alańynda biz qaıyrymdylyq qorlary qyzmetindegi problemalyq máselelerdi talqylaı alamyz dep sanaımyn. Óz kezeginde, Mınıstrlik jan-jaqty qoldaý kórsetýge daıyn. Biz memleket pen qoǵam óz kúsh - jigerin biriktirgen kezde ǵana oń nátıjelerge qol jetkize alamyz», - dedi Berdibek Saparbaev.
