Berdibek Saparbaev kásipkerlerge: Ózimizde ósetin pııaz ben qyryqqabattyń baǵalary árkelki

TARAZ. QazAqparat – Jambyl oblysynyń ákimi Berdibek Saparbaev iri saýda ortalyqtary basshylarynyń qatysýymen áleýmettik mańyzy bar azyq-túlik taýarlarynyń baǵasyn retteý máseleleri boıynsha keńes ótkizdi, dep habarlaıdy QazAqparat tilshisi.

Aımaq basshysy áleýmettik mańyzy bar azyq-túlik ónimderiniń baǵasyn turaqtandyrý boıynsha júıeli jumys júrgizýdiń mańyzdylyǵyn atap ótti.

«El Prezıdenti Qasym-Jomart Toqaev áleýmettik mańyzy bar azyq-túlik taýarlary boıynsha memlekettik baǵa retteýdi engizýdi tapsyrdy. Apta saıyn osy másele boıynsha Úkimet otyrysy ótýde, jergilikti atqarýshy organdarǵa baǵanyń negizsiz ósýine jol bermeý boıynsha sharalar qabyldaý týraly mindetter júkteldi. Monıtorıng qorytyndylary kórsetkendeı, Tarazdaǵy iri saýda ortalyqtarynda birdeı taýarlar ártúrli baǵada satylýda. Bulaı bolmaıdy. Áleýmettik mańyzy bar taýarlardyń belgilengen shekti baǵalary qatań saqtalý qajet», - dep atap ótti oblys ákimi.

Basqosýda Kásipkerlik jáne ındýstrııaldy-ınnovatsııalyq damytý, Aýyl sharýashylyǵy basqarmalarynyń, Memlekettik kirister departamentiniń, «Taraz-ÁKK»UK» AQ, óńirlik kásipkerler palatasynyń basshylary aǵymdaǵy ahýal men atqarylyp jatqan jumystar týraly baıandady.

Oblys ákimi jekelegen azyq-túlik ónimderiniń baǵasyn turaqtandyrý úshin salalyq sharalar qabyldaýdy tapsyrdy.

«Ózimizde ósetin pııazdyń, qyryqqabattyń baǵalary da árkelki. Aýdan ákimderi, jaýapty basqarma basshylary saýda jelileri men jergilikti taýar óndirýshiler arasynda uzaq merzimdi kelisimsharttar jasalýyn qamtamasyz etýi tıis. Áleýmettik mańyzy bar 19 azyq-túliktiń 9 túrimen oblysymyz ózin-ózi qamtamasyz etedi, 8 túri boıynsha qamtamasyz etý kórsetkishi 50 paıyzdan asady, tek qaraqumyq pen kúrish qana bizde joq. Áleýmettik mańyzy bar azyq-túlik baǵasynyń osy eki túrin jetkizý boıynsha basqa óńirlermen memorandýmdarǵa qol qoıylǵan», - dedi Berdibek Saparbaev.

Sondaı-aq aımaq basshysy qoldanystaǵy zańnamaǵa sáıkes ÁMAT boıynsha taýarlyq ústeme baǵanyń 15% asyp ketý faktilerine jedel sharalar qabyldaýdy, kókónis qoımalaryn jabdyqtaýdy, jármeńkeler ótkizýdi jalǵastyrýdy jáne deldaldyq shemalardy joıýdy tapsyrdy.

Azyq-túlik qaýipsizdigi máseleleri jónindegi monıtorıngilik toptardyń quramy jańartylady. Quramǵa memlekettik organdardyń ókilderi, qoǵam qaıratkerleri, depýtattar, BAQ ókilderi enedi.

«Biz óz paıdamyzdy emes, halyqty oılaýymyz kerek», – dedi oblys basshysy kásipkerlerge.