Berdibek Saparbaev kásipkerlerdi kópbalaly otbasylarǵa kómek kórsetýge shaqyrdy

NUR-SULTAN. QazAqparat - Qazaqstan Respýblıkasy Úkimetiniń otyrysynda Qazaqstan Respýblıkasynyń Eńbek jáne halyqty áleýmettik qorǵaý mınıstri Berdibek Saparbaev Elbasynyń «Áleýmettik qamqorlyq» bastamasyn iske asyrý sheńberinde áleýmettik jobalar týraly habardar etti. Bul týraly QR Eńbek jáne halyqty áleýmettik qorǵaý mınıstrliginiń baspasóz qyzmetinen habarlandy.

Mınıstrdiń aıtýynsha, aǵymdaǵy jyly jergilikti atqarýshy organdar 821 myń adamǵa áleýmettik qoldaý sharalaryn usynýǵa 83 mıllıard teńge bóledi. Jyl basynan bastap 9,3 mlrd. teńge somasynda 282 myń adamǵa kómek kórsetildi. Budan basqa, 2019 jyly 373 myń jańa jumys ornyn qurý josparlanýda, qazirdiń ózinde 31,9 myń jumys orny ashyldy.

Kópbalaly jáne az qamtylǵan otbasylardy turǵyn úımen qamtamasyz etý da mańyzdy másele bolyp tabylady. Osylaısha, jyl saıyn memlekettik bıýdjet qarajaty esebinen 6 myń jalǵa beriletin páter, turǵyn úı qurylys jınaq bankiniń jeńildetilgen qaryzdary arqyly 6 myń úı salý josparlanýda. 2025 jylǵa deıin jalpy somasy 500 mlrd. teńgeden astam 58 myń páter, onyń ishinde 2019 jyly 12 myń páter salynatyn bolady.

«Memleket elimizde bıznesti damytýǵa aıtarlyqtaı qoldaý kórsetýde. Óz kezeginde bıznes-qaýymdastyq áleýmettik máselelerdi sheshýde qoldaý kórsete alady», - dedi B. Saparbaev.

Mınıstr óńirlerdegi bıznestiń áleýmettik bastamalarynyń oń mysaldaryn keltirdi. Mysaly, Mańǵystaý oblysynda «Bıznes úsh kún ishinde» áleýmettik jobasy júzege asyrylýda. Qazirgi ýaqytta joba aıasynda Jańaózen qalasynda shaǵyn bıznes ashýǵa 70 otbasyna kómek kórsetilip, 140-tan astam adam jumyspen qamtyldy.

Aqtóbe oblysynda «Kásipker - ana» jobasy boıynsha kópbalaly analardy demeýshilik qarajat esebinen granttar berý arqyly bıznes negizderine úıretedi. 2019 jyldyń 1 toqsanynda 25 áıelge oqytý, bıznes-josparlar qurý, granttar berý sııaqty óz bıznes-jobalaryn iske asyrýǵa kómek kórsetildi.

Shymkent qalasynda «Meyirim» elektrondyq portaly iske qosyldy. Qazirgi ýaqytta bazada 500 otbasy tirkelgen, onyń 147 kópbalaly otbasy. 2019 jyldyń І toqsanynda osy joba aıasynda kópbalaly otbasy úshin bir úı berilip, 173 otbasyna 12 mln.teńge somasynda aqshalaı kómek berildi.

Nur-Sultan qalasynda 200 az qamtylǵan jáne kópbalaly otbasy turǵyn úı alady, onyń 50-i aǵymdaǵy jyldyń sońyna deıin baspanaly bolady. Sonymen qatar ákimdik jalpy somasy 2 mlrd. teńge somasynda eki myń adamǵa turǵyn úı sertıfıkattaryn beredi.

Óz kezeginde Premer-Mınıstrdiń orynbasary G. Ábdiqalyqova Elbasynyń jańa «Áleýmettik qamqorlyq» áleýmettik sharalaryn túsindirý boıynsha Úkimettik jumys tobynyń saparlarynyń qorytyndysy boıynsha halyqtyń, iri kásiporyndardyń, bıznes-qurylymdardyń jáne kásipodaqtardyń basshylary Elbasynyń jańa áleýmettik sharalaryn belsendi túrde qoldaıtynyn atap ótti.

Óz qyzmetkerleri men jergilikti halyqty áleýmettik qoldaý máselelerinde Bıznestiń bastamashyldyǵy baıqaldy.