Berdibek Saparbaev: Kásip bastaýdan qoryqpaý qajet
Elordalyq meımandar Memleket basshysynyń halyqqa arnaǵan Joldaýy aıasynda óńirde júrgizilip jatqan jumystarmen tanysyp, birqatar nysandardy aralady. Aldymen olar Taza Shańdaq aýylynda jaqynda ashylǵan feldsherlik-akýsherlik pýnkttiń qyzmetimen tanysyp, dárigerlermen júzdesti. Aıta ketý kerek, FAP (feldsherlik-akýsherlik pýnkt) salý jobasy memlekettik-jekeshelik áriptestik aıasynda júzege asyrylǵan. Ǵımarat qurylysyna «Turar» JShS dırektory 63 mıllıon teńge jumsady. Jalpy, bul seriktestik ósimdik jáne mal sharýashylyǵymen aınalysady. Berdibek Saparbaev kásipkerdiń jumysyn joǵary baǵalap, sáttilik tiledi. Sondaı-aq, halyqtyń turmys jaǵdaıy men ál-aýqatyn jaqsartý máselesi erekshe nazarda ekenin atap ótti. Onyń sózinshe, áleýmettik salada aýqymdy jumys atqarylýda.
«Úkimettiń jumys toby oblys turǵyndaryna Memleket basshysynyń Joldaýynda belgilengen negizgi mindetterdi júzege asyrý barysy týraly aıtý úshin keldi. Negizi jańa bastamalar eshqashan ońaı júzege aspaıdy, biraq biz eshnárseden qoryqpaı, alǵa umtylýymyz kerek, óıtkeni kez kelgen qıyndyqtardy eńserýge bolady. Onyń ústine, memleket te únemi qamqorlyq tanytyp, óz halqyna qoldaý kórsetip otyrady», - deıdi B. Saparbaev.
Aýdandyq mádenıet úıinde úkimettik jumys toby aýdan turǵyndarymen kezdesti. Eńbek jáne halyqty áleýmettik qorǵaý mınıstri Birjan Nurymbetov aýyl turǵyndaryna 2020 jyldyń 1 qańtarynan bastap engiziletin kóp balaly jáne az qamtylǵan otbasylardy memlekettik qoldaýdyń jańa tásilderin túsindirdi.
«Eń bastysy, memleket kómekke muqtaj adamdarǵa, ásirese balalar men kópbalaly otbasylarǵa kómektesedi. Eńbekke qabiletti azamattar jumys isteýi kerek. Memleket jumysqa ornalasýdyń nemese shaǵyn bıznespen aınalysýdyń tetikterin qarastyrdy. Memlekettik kómekke kóp balaly otbasylardy qoldaý, az qamtamasyz etilgen otbasylarǵa ataýly áleýmettik kómek kórsetý, áleýmettik jaǵdaıy tómen otbasylardaǵy balalarǵa kepildendirilgen áleýmettik paketi kiredi», – dedi Birjan Nurymbetov.
Mınıstrdiń aıtýynsha, tabysy az otbasylardan shyqqan balalar úshin kepildi áleýmettik paketti engizý usynylady. 1 jastan 6 jasqa deıingi balalardy azyq-túlik jıyntyǵymen jáne gıgıenalyq quraldarmen, 6 jastan 18 jasqa deıingi balalardy mektepterde ystyq tamaqpen, oqý quraldarymen jáne mektep kıimmen qamtamasyz etedi, sondaı-aq olarǵa mektepke deıingi jol júrý shyǵyndary óteletin bolady. 18 jasqa deıingi balalarǵa medıtsınalyq kómek, onyń ishinde stomatologııalyq kómek aqysyz medıtsınalyq kómektiń jáne mindetti áleýmettik medıtsınalyq saqtandyrýdyń kepildendirilgen mólsheri aıasynda kórsetiledi.
«AÁK tabysy az otbasylarǵa tólenedi. Kómek mólsheri jan basyna shaqqandaǵy ortasha tabys pen otbasynyń árbir múshesine shaqqandaǵy ETKD-niń 70%-y arasyndaǵy aıyrmashylyqty quraıdy. Biz toqsan saıyn AÁK taǵaıyndaý men tólemderdi tekseremiz. Ýchaskelik komıssııalardyń jumysyn kúsheıtemiz. Eger otbasy talaptarǵa saı kelmese, olarǵa AÁK taǵaıyndaýdan bas tartylýy múmkin», – dep tolyqtyrdy Nurymbetov.
Berdibek Saparbaev halyqty dári-dármekpen qamtý, medıtsınalyq ońaltý qyzmetteri jetile túsetinin aıtty. Sondaı-aq, 2025 jylǵa deıin barlyq eldi mekenderde eń keminde medıtsınalyq beket nemese emhana bolýy tıis. Munan bólek apatty jaǵdaıdaǵy barlyq medıtsınalyq mekemeler jóndeledi ári olardyń materıaldyq-tehnıkalyq bazasy halyqaralyq talaptarǵa sáıkestendiriledi.
Sapar qorytyndysy boıynsha B.Saparbaev oblys basshylyǵyna turǵyndardyń ómir súrý sapasyn odan ári arttyrý boıynsha birqatar naqty tapsyrma berdi.
Eske salsaq, QR Premer-Mınıstriniń orynbasary Berdibek Saparbaev keshe Qostanaıdyń jastar aktıvimen kezdesken bolatyn.
