Berdibek Saparbaev – Karantın sharalaryna qaramastan qurylys báseńdemeýi kerek
TARAZ. QazAqparat – Aǵymdaǵy jyly Jambyl oblysynda aýqymdy qurylys kólemin júzege asyrý mindeti tur. Osy oraıda engizilgen karantınge baılanysty shekteý sharalaryna qaramastan qurylys materıaldary men konstrýktsııalaryn shyǵaratyn jergilikti kásiporyndardyń rezervteri men múmkindikterin nyǵaıtý qajet, dep habarlaıdy QazAqparat oblys ákimdiginiń resmı saıtyna silteme jasap.
Oblys ákimi Berdibek Saparbaev Taraz qalasynyń birqatar óndiristik kásiporyndaryn aralady. Ol aldymen «Gımarat Temir Beton» JShS-niń óndiristik tsehtarynda, «Bınom» kompanııasynyń iri paneldi qurylys kombınatynda, sondaı-aq gıps shyǵaratyn zaýyttarda boldy.
Taraz qalasynda karantın jarııalanǵanyna qaramastan temir beton buıymdar zaýytynda jumys qyzý júrip jatyr. Munda qurylys pen aýyl sharýashylyǵy salasynda qajetti beton plıtalar, naýalar, baǵandar, basqa da buıymdar daıyndalady.
Kásiporyn dırektory Qaldarbek Smatovtyń aıtýynsha, shyǵarylǵan buıymdaryn ótkizýde eshqandaı kedergi joq. Ónim tsehtardan tutynýshylarǵa tikeleı jóneltiledi. Degenmen, karantınniń jarııalanýyna baılanysty tasymaldaýǵa qatys birqatar máseleler týyndaǵanyn joqqa shyǵarmady.
- Zaýytta 150 adam eńbek etedi,olardyń eńbekaqysy — 90-100 myń teńgege quraıdy. Muqtajdarǵa materıaldyq kómek kórsetilip turady, - deıdi ol.
- Basty mindet – óndiris qýatyn arttyrý, shyǵarylatyn ónim kólemin eseleý. Іri kásiporyndar jumys isteýin toqtatpaý kerek, biraq barlyq sanıtarlyq sharalardy saqtaýǵa asa kóńil bólgen abzal. Al tasymaldaýǵa qatysty máseleler sheshiledi. Qurylysqa qajetti materıaldar tasymaly, osy salanyń mamandary úshin biz «jasyl dálizdi» qamtamasyz etetin bolamyz. Sizder tek jedel shtabqa qajetti ótinimdi jiberińizder, - dedi oblys ákimi.
«Bınom» JShS – Jambyl oblysynyń iri qurylys kompanııalarynyń biri bolyp tabylady. Menshikti kópfýnktsıonaldy jańǵyrtylǵan baza, qurylys tehnıkasy men avtokólik parkiniń bolýy, qurylys betony, shyny plastıktiń, aǵash jáne metall konstrýktsııalarynyń óndiristeri kásiporynǵa Qazaqstannyń ońtústik aımaǵynyń kez kelgen núktesinen jańa qurylysty bastaýǵa múmkindik beredi.
- Bizdiń úı qurylysy kombınatynyń jyldyq qýaty 30 myń sharshy metrdi quraıdy. 2019 jyly Taraz qalasyndaǵy 15 shaǵyn aýdandaǵy eki turǵyn úı, Qarasý massıvinde 4 jataqhana, 9 shaǵyn aýdanda turǵyn úı jáne Súleımenov kóshesinde bir úı paıdalanýǵa berdik. Qazirgi ýaqytta «Bınom» JShS bes jobany júzege asyrýda. Sonyń biri retinde 9 qabatty iri paneldi turǵyn úıdiń qurylysy júrgizip jatqanymyzdy aıtýǵa bolady. Sondaı-aq, 2020 jyly memleket esebinen 60 myń sharshy metrge jýyq turǵyn úı salý josparlanǵan, - dedi kásiporynnyń bas dırektory Serik Oljabekov.
Jumys sapary barysynda Berdibek Saparbaev sondaı-aq gıps óndiretin eki zaýytta boldy. Oblys ákimine «KazÝpakTreıd» JShS-niń tehnıkalyq dırektory Sefettın Hyzardjy kásipornynyń qyzmeti týraly jan-jaqty baıandady. Onyń aıtýynsha, kásiporyn ónimderi tek Tarazda ǵana emes, úlken kólemde Nur-Sultan men Almaty qalalaryna da jóneltiledi. Aǵymdaǵy jyldyń úsh aıynda 3200 tonna gıps shyǵarylǵan.
Ónerkásip kásiporyndarynyń basshylarymen kezdesý barysynda oblys ákimi jumysshylardyń jaı-kúıine asa nazar aýdarý kerektigin basa aıtty. Olardyń jalaqylarynyń ýaqytyly tólenýi jáne karantın kezeńinde ınfektsııadan jeke qorǵaný quraldarymen qamtamasyz etýdiń mańyzdylyǵyn tilge tıek etti.
