Berdibek Saparbaev – Qar túskenshe eshkim senbilikti toqtatpaýy tıis
Onlaın rejıminde ótken basqosý oblys ákimdiginiń Youtube arnasynan jáne resmı saıty arqyly taratyldy.
Energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaevtyń aıtýynsha, bıyl eldi mekenderdi abattandyrýǵa jáne sanıtarlyq tazalyqqa bıýdjetten 4,1 mıllıard teńge bólingen. Taraz qalasy jáne oblystyń barlyq aýdandarynda senbilikter ótkizilýde.
16 myńnan astam aǵash otyrǵyzylyp, 600 shaqyrymnan astam kanaldar men aryq júıeleri, 1404 shaqyrym kóshe boılary tazartylyp, polıgonlarǵa 1860 tonna qoqys shyǵarylǵan. Saıabaqtarda gúlzarlar otyrǵyzylyp, al irgeles aýmaqtar túrlene túsken.
Alaıda barlyq aýdandarda abattandyrý sharalary josparǵa saı júrgizilip otyrǵan joq. Máselen, Baızaq, Jambyl, Jýaly, T.Rysqulov aýdandarynyń aýyldary men Taraz qalasynyń kóshelerinen qoqys úıindilerin kóptep kezdestirýge bolady.
«Aıta ketý kerek, sońǵy eki aıda oblys ortalyǵynda aýqymdy jumystar atqarylýda. «Jasyl El-Taraz» JShS arnaıy tehnıkanyń sanyn 16-dan 26 birlikke arttyrdy. Jergilikti bıýdjet esebinen satyp alynǵan 700 konteıner qaladaǵy qoqys alańshalaryna ornatyldy. Taǵy osyndaı 1000 dana konteıner satyp alý josparlanyp otyr», - dedi Q.Qorǵanbaev.
Berdibek Saparbaevtyń saýalyna jaýap qatqan atalǵan aýdan ákimderi ekologııalyq qaýipsizdikti qamtamasyz etý boıynsha sharalar qabyldaıtyndyqtaryn jáne tártip buzýshylar ákimshilik jaýapkershilikke tartylatyndyǵyna sendirdi.
«Tarazda jáne aýdandarda aǵashtar men butalardyń qýrap jatqandyǵyna qatysty turǵyndar shaǵymdanýda. Sebep durys sýarýdyń uıymdastyrylmaýy. Energetıka jáne turǵyn úı-kommýnaldyq sharýashylyq basqarmasy da, aýdan ákimderi de bul máseleniń sheshilýine múddeli. Bul turǵyda qomaqty qarajat bólinedi. Taraz aýmaǵyn abattandyrý men sanıtarlyq tazartýǵa eki mıllıard teńge qarastyrylǵan. Al, onyń nátıjesi qaıda? - dedi oblys ákimi.
Jambyl jáne Sarysý aýdandarynda da osy maqsatqa kóp qarajat bólingen, biraq kóshet otyrǵyzýǵa aqsha jetpegen.
«Biz jylyna tek eki ret qana aǵash otyrǵyzamyz. Bul máseleni qadaǵalaý, aqsha bólý jáne aǵashtardyń jaı-kúıin baqylaa otyrý múmkin emes pe?» - dedi aımaq basshysy.
Barlyq aýdan ákimderine jáne oblys ákiminiń orynbasarlaryna U.Jazylbek pen B.Nyǵmashevqa eldi mekenderdi abattandyrý boıynsha naqty tapsyrmalar júkteldi.
«Qar túskenshe eshkim senbilikti toqtatpaýy tıis. Jergilikti turǵyndar belsendi qatysýy kerek, - dedi Berdibek Saparbaev.
Ol kanaldar men aryqtardy tazartýǵa erekshe nazar aýdardy.
«Qazir bul baǵytta oblysta aýqymdy jumystar júrgizilýde. Osy maqsatta arnaıy jumys toby quryldy. Bizdiń aldymyzda barlyq arnalar men sýarmaly aryqtardy qysqa merzimde tazalap, retke keltirý mindeti tur», - dedi oblys ákimi.
