Berdibek Saparbaev: Qaǵazbastylyq pen bıýrokratııany joıý qajet

ASTANA. QazAqparat - QR Eńbek jáne halyqty áleýmettik qorǵaý mınıstri Berdibek Saparbaev Astana qalasynyń Jumyspen qamtý ortalyǵy men Halyqty jumyspen qamtý jáne áleýmettik qorǵaý basqarmasyna baryp, qonaqtarmen áńgimelesti jáne azamattarǵa kórsetiletin qyzmet sapasymen tanysty, dep habarlaıdy QazAqparat mınıstrliktiń baspasóz qyzmetine silteme jasap.

Astana qalasynyń Jumyspen qamtý ortalyǵyna elektrondy kezek júıesi engizilgen, ózin-ózi basqarý aýmaǵy jumys isteıdi jáne elektrondyq eńbek bırjasy jumysymen ıntegratsııalanǵan.

2019 jyldyń basynan beri Astananyń 500-den astam turǵyny Jumyspen qamtý ortalyǵy arqyly jumysqa ornalasqan. Jastar tájirıbesine 200-ge jýyq jas maman jiberildi. Qazirgi ýaqytta jumyspen qamtý ortalyǵynda 5 myńnan astam bos jumys orny bar.

Berdibek Saparbaev Jumyspen qamtý ortalyǵynyń negizgi mindeti - ýaqtyly jáne sapaly áleýmettik qyzmet kórsetý úshin jaǵdaı jasaý ekenin atap ótti. Mıınstr Aqtóbe qalasyndaǵy «Halyqtyq keńse» jumysynyń oń tájirıbesin mysalǵa keltirdi. Onda halyqqa qyzmet kórsetý ortalyǵy, jumyspen qamtý, kóshi-qon, quqyqtyq, tsıfrlyq qyzmetter, sondaı-aq «Qazposhta» AQ jáne BJZQ fılıaldary usynatyn memlekettik qyzmetterdiń 600-den astam túri kórsetiledi. Halyq keńsesiniń barlyq qyzmetteri «bir tereze» qaǵıdaty boıynsha kórsetiledi.

Sonymen birge Jumyspen qamtý ortalyǵynda QR Eńbek jáne halyqty áleýmettik qorǵaý mınıstrliginiń basshylyǵymen jáne jergilikti atqarýshy organdardyń ókilderimen kezdesý ótti. Onda Memleket basshysynyń «Nur Otan» HDP XVIII sezinde bergen tapsyrmalary aıasynda qabyldanǵan sharalar talqylandy. Atap aıtqanda, balalar men jaǵdaıy tómen otbasylarǵa qoldaý kórsetý sharalaryn kúsheıtý men keńeıtýge, óńirlerdiń derbes áleýmettik kartalaryn jasaý jáne aqparattyq derekqorlardy biriktirýge erekshe nazar aýdaryldy.

Mınıstr naǵyz muqtaj otbasyn áleýmettik qoldaý qajettigin aıtty jáne olardy jumysqa ornalastyrý úshin jaǵdaı jasaýdy tapsyrdy.

«Ár otbasynyń qajettilikterin esepke alý kerek jáne qaǵazbastylyq pen artyq bıýrokratııalyq protsedýralardy joıý qajet», - dep atap ótti B. Saparbaev.

Astana qalasy Halyqty jumyspen qamtý jáne áleýmettik qorǵaý basqarmasynyń basshysy Ermek Ospanovtyń aıtýynsha, jyl saıyn Astanada 130 myńǵa jýyq adam áleýmettik qoldaýmen qamtylady, onyń ishinde 10 myńnan astam kópbalaly otbasylar, 3500-ge jýyq az qamtylǵan azamattar bar.