Berdibek Saparbaev ızraıldik ınvestorlarmen kezdesti
Aımaq basshysymen júzdesýge ızraıldik LR GROUP transulttyq korporatsııasynyń ókilderi keldi. Kompanııa negizinen aýyl sharýashylyǵyn damytýǵa baǵyttalǵan birlesken jobalardy iske asyrýmen aınalysady.
Kezdesýge oblys ákiminiń orynbasarlary men tıisti basqarma basshylary qatysty.
Berdibek Saparbaev qonaqtardy Jambyl oblysynyń áleýetimen qysqasha tanystyryp, aýyl sharýashylyǵy salasy ekonomıkalyq damýdyń negizgi kózi
ekenin atap ótti. Basty máseleniń biri retinde ol sýarmaly sýdyń kórshi Qyrǵyz eline táýeldiligin jáne aýyl sharýashylyǵy ónimderin qaıta óńdeý kenjelep turǵanyn atady. Jergilikti bılik dál osy jaǵdaıdy eskere otyryp, ızraıldik mamandardan yntymaqtastyq kútedi. Oblys bıligi óz tarapynan jer bólýge jáne qurylys ınfraqurylymyna járdem kórsetedi. Al «Taraz» ÁKK jobalarǵa atsalysýǵa nıetti.
LR GROUP kompanııasynyń ókili Mıhaıl Roı búkil álem boıynsha úsh myńnan astam adam eńbek etetin kompanııa qyzmetiniń aýqymy týraly aıtyp berdi.
«Qazaqstannyń aýyl sharýashylyǵynda nátıjeli jumystar bar, Izraıl tehnologııalarynyń qoldaýy da salanyń qaryshtap damýyna úles qosady.
Talaıǵa belgili, ızraıldikter shóldi aımaqtarda da agrarlyq sektordy damyta alǵan. Sondyqtan da, olar zamanaýı tehnologııalar, sapaly menedjment jáne
jergilikti kadrlardy oqytýda nátıje beredi. Sýdy únemdeýge keletin bolsaq, Izraılde shaǵyn fermalardyń qajettilikteri úshin shaǵyn ylǵal jınaqtaǵyshtar keńinen taraǵan, atalǵan tehnologııa búginde óz jemisin berýde»,-dedi ol.
Al, Mark Veltman atap ótkendeı, qazirgi ýaqytta LR GROUP 2,5 mıllıard dollardy quraıtyn jobalardy iske asyrǵan, taǵy 1,6 mıllıard dollardyń jobalary aıaqtalýǵa jaqyn. Kompanııanyń kásiporyndary TMD-da, sonyń ishinde Reseı, Belarýs, Ózbekstanda iske qosylǵan. Kompanııa tek tehnologııalyq sheshimderdi usynyp qana qoımaı, sonymen qatar birlesken ınvestor retinde de áreket etýge daıyn. Máselen, Reseı jáne Serbııa arasynda sút klasteri osy sharttar aıasynda júrgizilýde. Negizinnen ızraıldikter áriptestik jumystyń alǵashqy satysynda 50/50 teń negizde jumys isteýdi jón kóredi, biraq olar ózge de
usynystardy qarastyrýǵa daıyn.
«Biz aýyl sharýashylyǵy daqyldaryn, ásirese, kúrishti sýarýǵa qandaı sý kólemi jumsalatynyna tań qaldyq. Sizderge ylǵaldy tıimdi paıdalanýdy úırený óte mańyzdy», - dep atap ótti Mark Veltman.
Sondaı-aq ızraıldikter 400 dollar turatyn otbasylyq sýarý júıelerin usynyp otyr. Bul aýyl turǵyndarynyń tabysyn arttyrý pılottyq jobasynyń qatysýshylary úshin taptyrmaıtyn múmkindik bolmaq.
Budan bólek Jambyl oblysyndaǵy shalǵaı jatqan aýyldaryna kóp shaqyrymdyq elektr jelilerin tartýdan góri, shaǵyn kún qondyrǵylaryn ornatý tıimdi. Osy oraıda kompanııanyń balamaly energetıka baǵytyna jaýapty Iotam Rats jergilikti jerde tabysty júzege asatyn sheshimderin usyndy.
Kezdesýdi qorytyndylaı kele, Berdibek Saparbaev on kún ishinde usynystardy zerdelep, sodan keıin ǵana ár baǵyt boıynsha naqty sóılesýge bolatynyn atap ótti.
