Berdibek Saparbaev «Garant 24 Lombard» salymshylarymen kezdesti

TARAZ. QazAqparat – Jambyl oblysynyń ákimi Berdibek Saparbaev jetekshileri alaıaqtyq jasady dep aıyptalǵan «Vygodnyı zaım» jáne «Garant 24 Lombard» nesıe kompanııalary salymshylarynyń múddesin qorǵap júrgen Taraz qalasynyń turǵyndary Nurgúl Shalova, Berdibek Avhınbaev jáne Saıda Elýbekovamen kezdesti, - dep habarlaıdy QazAqparat tilshisi.

Búkil Qazaqstan boıynsha júzdegen adam qarjy pıramıdasynan zardap shekkeni belgili. Jarnamaǵa senip, adamdar kúmándi kompanııalarǵa qomaqty aqsha salǵan. Sonymen qatar, salymshylar kompanııalardyń lıtsenzııasyz jumysyna alańdaýshylyq tanytpaǵan. Nátıjesinde tez jáne ońaı jolmen baıyǵysy kelgender qapyda qaqpan basyp, ózderi salǵan qarjylaryn qaıtara almaýda. Salymshylardyń kópshiliginde bankterde nesıeleri bar desek, olardy ýaqtyly tóleý kerektigi belgili.

«Sizderdiń máselelerińizdi jaqsy bilemiz. Bul is boıynsha tergeý áli jalǵasýda. Munan keıin sot protsesi ótedi. Óz kezegimizde biz de sizderdiń máselelerińizdi zań aıasynda ońynan sheshilýine qol ushyn sozatyn bolamyz, - dedi oblys ákimi.

Ótinish berýshiler alaıaqtardyń ózderiniń laıyqty jazasyn alatyndaryna jáne aqshalaryn qaıtaratyndaryna kúmándanady. Sondaı-aq, olar nesıeleri boıynsha jeńildik kezeńin alýǵa kómek surady.

«Kináliler zańǵa sáıkes jaýap beredi. Bul kompanııalarǵa qatysty qylmystyq ister muqııat zertteletin bolady jáne tergeýdiń obektıvti túrde ótetinine kúmán joq. Qazir ondaı zaman emes. Sizderdiń qazirgi nesıeler boıynsha tólemderińizge keletin bolsaq, meniń tıisti orynbasarym osy másele boıynsha jumys jasaıdy. Biz múmkindiginshe kómektesýge tyrysamyz», - dep sendirdi ol.