Berdibek Saparbaev fermerlerge qyzmet kórsetý ortalyǵyn ashýdy usyndy

AQTÓBE. QazAqparat - Aqtóbede Premer-Mınıstrdiń orynbasary-aýyl sharýashylyǵy mınıstri Ómirzaq Shókeevtiń qatysýymen «Aqyldy tehnologııalar» - agroónerkásip keshenin qarqyndy damytý múmkindigi» atty respýblıkalyq forým ótti, dep habarlaıdy QazAqparat tilshisi.

Búgin Aqtóbege ár aımaqtan aýyl sharýashylyǵyna jaýapty ákimdik ókilderi men sharýalar jınaldy. Olar aýyl sharýashylyǵyn damytý, eksportty arttyrý, tsıfrlyq tehnologııany sharýashylyqqa engizý joldaryn talqylap, máselelerdiń túıinin sheshýge tyrysty. Aldymen oblys ákimi Berdibek Saparbaev óńirdiń aýyl sharýashylyǵy salasynyń damý joldaryn baıandady. Máselen, 2017 jyly aýyl sharýashylyǵy 210 mıllıardtan astam ónim shyǵardy. Jerdi tıimdi paıdalaný maqsatynda esep júrgizilip, ótken jyly 7 mıllıon ga jer aýmaǵy zertteldi, qosymsha 400 myń gektar jer paıdalanýǵa berildi.

«Aýyl sharýashylyǵynyń ónimdiligin kóbeıtý úshin tuqym sapasyn arttyrý kerek. Jylyna orta eseppen 120-130 myń tuqym qajet boldy. Ótken jyly tuqymnyń 20 paıyzy úshinshi reprodýktsııa boldy.  Ózgesi - 1,2 jáne elıtaly sorttan. Bul jumysty ári qaraı jalǵastyramyz. Sonymen qatar, Úkimettiń qoldaýymen tyńaıtqysh eki ese kóp alyndy. Ótken jyly 656 gektar jerge egis egildi. Maqsatymyz -  egis kólemin jylyna kem degende 15 paıyzǵa kóbeıtý. Ótken jyly gektarynan 13,2 tsentner ónim alyndy»,- dedi oblys ákimi Berdibek Saparbaev.

 

Aqtóbede mal sharýashylyǵy da jaqsy damyp keledi. Qazir kezde 426 myń iri qara, 1,1 mıllıon bas qoı, 117 myń bas jylqy bar. Ósim orta eseppen 4-7 paıyz aralyǵynda saqtalǵan. Sonymen qatar, Aqtóbe sýarmaly jer kólemin arttyrady. Qazirgi kezde Sý komıteti Eýropalyq qaıta qurý jáne damý bankimen, Azııa damý bankimen jumys júrgizip jatyr. Aldaǵy ýaqytta 12 mıllıard teńge nesıe alynyp, sýarmaly jer kólemi 20 myń gektarǵa artady. Sý qoımalary tolyq qýattylyqta jumys istegen ýaqytta Aqtóbede 70 myń gektar jer sýarmaly bolady. Aqtóbe oblysynyń ákimi óńir kórsetkishterin tizbektep, mınıstr Ómirzaq Shókeevke birneshe usynys aıtty.

«Qazirgi zaman talabyna saı fermerlerge qyzmet etý ortalyǵyn qurý kerek. Satý, satyp alý kezinde baǵa turaqtylyǵyn qamtamasyz etý, deldaldarsyz jumys isteý qajet. Sharýalar men fermerlerge bir jerden qyzmet kórsetilse, aýyl sharýashylyǵynda damý bolady. Sonymen qatar, mal basyn kóbeıtip, eksportty arttyrý úshin analyq mal basyn arttyrý qajet. Sýarmaly jerdi ıgerý kezinde de Úkimetten qoldaý kútemiz. Ári Elbasy tapsyrmasyna oraı «Qazirgi zamannyń aýyly» jobasyn usynamyz. Aýyl óz-ózin tolyǵymen qamtamasyz etip, adamnyń bárine jumys taýyp beredi. Aýyl Aqtóbe qalasyn tamaqpen qamtamasyz etýi shart»,- dedi Aqtóbe oblysynyń ákimi Berdibek Saparbaev.