Berdibek Saparbaev: Eńbek daýlaryn shý shyqpaı turyp sheshý kerek
NUR-SULTAN. QazAqparat – Úkimet basshysynyń orynbasary Berdibek Saparbaev jalaqynyń ýaqtyly berilýin, jumys oryndarynda negizsiz qysqartýdyń aldyn alý úshin eńbek táýekelderi jónindegi karta jasalǵanyn málim etti, dep habarlaıdy QazAqparat tilshisi.
«Qaralyp otyrǵan máseleniń mańyzyn eskere kele 23 qarashada úshjaqty komıssııanyń otyrysy ótti. Sonda osy máselelerdiń (eńbek qatynastary, eńbek daýlary) barlyǵy jan-jaqty qaraldy. Buǵan qosymsha óńirlerde arnaıy májilisterdi ótkizdik. Prezıdent Ákimshiligi jetekshisiniń, barlyq ákimderdiń qatysýymen de jıyn bolǵan kezde barlyq óńir basshylaryna ótinishimizdi aıttyq. Úkimet basshysynan suraıtynymyz – ákimderge tapsyrma berseńiz... Eń basty másele – eńbek daýlarynyń aldyn alý kerek. Biz negizinen kóp jaǵdaıda shý shyqqannan keıin ǵana jumys júrgizemiz. Sondyqtan, jalaqynyń ýaqtyly berilýin, jumystar negizsiz qysqarýdyń bolmaýyn aldyn alý úshin eńbek táýekelderi jónindegi kartany jasaǵan bolatynbyz», - dedi Berdibek Saparbaev Úkimet otyrysynda.
Premer-mınıstrdiń orynbasary óz sózinde árbir ákimdikter sol kartanyń oryndalýyn qarap, tıisti sharalardy qoldaný kerektigin atap ótti.
«Ekinshiden, jumys berýshi men jumysshy arasyndaǵy eńbek kelisimsharttaryna der kezinde qol qoıylsa eshqandaı másele týyndamaıdy. Jyldyń aıaǵy kele jatyr. Suraıtynymyz: osy máselege taldaý júrgizip, kelisimsharttar boıynsha oryndalmaǵan jaǵdaılarmen aınalysý kerek. Jalpy, kásipodaqtardyń rólin arttyrǵan jón», - dedi Berdibek Saparbaev.
Eske sala ketsek, Úkimet basshysy jalaqy bermeýdi jumys berýshi úshin tıimsiz bolatyndaı etip zańnama normalaryn kúsheıtýdi tapsyrdy.
