Berdibek Saparbaev elordada kópbalaly analarmen kezdesti
Vedomstvonyń baspasóz qyzmetinen málim etkendeı, kezdesýge sondaı-aq, Eńbek jáne halyqty áleýmettik qorǵaý vıtse-mınıstri Svetlana Jaqypova, Densaýlyq saqtaý vıtse-mınıstri Lázzat Aqtaeva, Bilim jáne ǵylym vıtse-mınıstri Elmıra Sýhanberdıeva, QR Indýstrııa jáne ınfraqurylymdyq damý mınıstrligi Qurylys jáne turǵyn úı kommýnaldyq sharýashylyǵy isteri komıtetiniń tóraǵasy Marhabat Jaıymbetov, Nur-Sultan qalasynyń Jumyspen qamtý jáne áleýmettik qorǵaý basqarmasynyń basshysy Sáýle Nurǵojına qatysty.
Onyń barysynda kópbalaly analarǵa memlekettik qoldaý sharalary týraly aqparat berildi. Qoldanystaǵy jeńildikterden basqa, kelesideı qosymsha sharalar da qarastyrylýda - zeınetkerlikke 53 jasta merziminen buryn shyǵý, jumys istemeıtin ananyń 3 jasqa deıingi bala kútimi boıynsha kezeńin eńbek ótiline qosý, salyq pen baj salyǵynyń keıbir túrlerin tóleýden bosatý quqyǵy, turǵyn úıge jeńildetilgen kezekke turǵyzý jáne mundaı sanattaǵy azamattarǵa memlekettik qoldaýdy kúsheıtý.
Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasyna ózgerister engizilýde. Máselen, jumyspen qamtýdy qamtamasyz etý jáne tabysty arttyrý úshin aýylda turatyn kópbalaly otbasylarǵa jańa bıznes-ıdeıalarǵa 505 myń teńge mólsherinde qaıtarymsyz memlekettik granttar beriletin bolady. Sondaı-aq, aǵymdaǵy jyly kópbalaly analar men múgedektigi bar adamdar arasynda kásipkerlikti damytýǵa 5 myń mıkrokredıt beriledi.
«Sonymen qatar, aýylda turatyn az qamtylǵan otbasylar úshin qajetti mamandyqtarǵa qysqa merzimdi oqytý uıymdastyrylady. Jekelegen jumys túrleri boıynsha jalaqyny sýbsıdııalaýmen úıde áleýmettik jumys oryndary qurylatyn bolady. Budan bólek, mınıstrlik áleýmettik jaǵdaıy tómen otbasylarǵa jergilikti atqarýshy organdar tarapynan kórsetiletin áleýmettik kómek pen qyzmetterdiń biryńǵaı paketin ázirledi. Áleýmettik pakette jergilikti atqarýshy organnyń qarajaty esebinen áleýmettik qoldaý jáne áleýmettik qyzmet kórsetý boıynsha 11 shara qamtylǵan. Ákimdikterdiń málimetinshe, 2019 jyly 287 myń bala mektepterde tegin tamaqpen, 553 myń adam tegin jol júrýmen, 219 myń oqýshy mektep formasymen jáne kerek-jaraqtarmen, 30 myńǵa jýyq bala balabaqshalarda orynmen qamtamasyz etiledi, 186 myń bala lagerge joldama alady, 460 myńnan astam adam bir jolǵy kómek alady, 5 myń AÁK alýshy jumyspen qamtylady, 5 myń adam turǵyn úı qurylys jınaqtary júıesi arqyly baspana jaǵdaıyn jaqsartady. Jalpy áleýmettik kómektiń barlyq túrlerimen 83,1 mlrd. teńgege 821 myń adamdy qamtý josparlanýda», - delingen baspasóz baıanynda.
Kezdesýge qatysqan kópbalaly analar «Baqytty otbasy» baǵdarlamasy aıasynda turǵyn úı jaǵdaıyn jaqsartý, jalpy bilim berý qory aıasyndaǵy qoldaý, sanatorlyq-kýrorttyq emdeý, medıtsınalyq qyzmet kórsetý, sonyń ishinde stomatologııalyq qyzmet kórsetý jáne basqa da memlekettik qoldaý sharalaryn alý týraly suraqtar qoıǵan.
Mınıstrlik jáne ákimdik ókilderi barlyq suraqtar boıynsha túsinikteme bergen.
«Eńbek mınıstrligi vedomstvo quzyretine kiretin máselelerdi sheshýdi jeke baqylaýǵa aldy. Aǵymdaǵy jylǵy 1 mamyrdaǵy jaǵdaı boıynsha Qazaqstanda «Altyn alqa» jáne «Kúmis alqamen», «Ana dańqy» ordenderimen marapattalǵan, buryn «Batyr ana» ataǵyn alǵan 235 myńnan astam kópbalaly ana turady. Onyń 4787-si Nur-Sultanda turady.
