Berdibek Saparbaev: Dıvanda jatyp jaqsy nátıjelerge qol jetkizý múmkin emes
NUR-SULTAN. QazAqparat - QR Eńbek jáne halyqty áleýmettik qorǵaý mınıstri Berdibek Saparbaev pen QR Qorǵanys mınıstri Nurlan Ermekbaev Arys qalasynyń ardagerlerimen kezdesti. Bul týraly QazAqparat mınıstrliktiń baspasóz qyzmetine silteme jasap habarlaıdy.
Ardagerlermen kezdesý barysynda birqatar ózekti máseleler, sonyń ishinde Arys turǵyndaryn jumysqa ornalastyrýdy qamtamasyz etý máseleleri talqylandy.
«Eńbek mınıstrligi men Túrkistan oblysynyń ákimdigi qala turǵyndarynyń jumysqa ornalasýyna jáne jeke kásibin ashýǵa kómek kórsetedi. Eshkim jumyssyz qalmaıdy. Bul másele erekshe baqylaýǵa alynǵan», - dep atap kórsetti Saparbaev.
Sonymen qatar, ol qalany qalpyna keltirý, turǵyn úı, áleýmettik jáne ınfraqurylymdyq nysandardy jóndeý jumystaryna Arys turǵyndaryn ózderin de belsendi qatysýǵa shaqyrdy.
«Bul jumys úshin eńbekaqy tólenedi, bir aıda orta eseppen 150 myń teńge tabýǵa bolady. Dıvanda jatyp alyp jaqsy nátıjelerge qol jetkizý múmkin emes ekendigin jerlesterge jetkizýlerińizdi suraımyn. Memleket berip otyrǵan múmkindikterdi barynsha paıdalanýymyz kerek», - dedi Saparbaev.
Sonymen qatar, vedomstvo basshysy Arys turǵyndaryn arandatýshylyqqa ermeýge shaqyrdy.
«Keıbir jerlester jekelegen adamdardyń jalǵan aqparaty men arandatýyna erip ketti. Kúlli Qazaqstandyqtar Arys turǵyndaryna qol ushyn sozǵan sátte, olardyń keıbireýleri ózderiniń talaptaryn aldyǵa tartty. Arandatýshylardyń arbaýyna túspeýimiz kerek!», - dedi Saparbaev.
Mınıstr Prezıdenttiń tapsyrmasy boıynsha Arys qalasynyń turǵyn úı, áleýmettik jáne ınfraqurylymdyq nysandaryn qalpyna keltirý jumystarynyń jalǵasyp jatqanyn atap ótti. Qalpyna keltirý jumystaryna Qazaqstannyń barlyq óńirleri belsene atsalysýda.
Іssapar barysynda Berdibek Saparbaev Túrkistan oblysynyń birqatar aýdandaryn aralady, sondaı-aq áleýmettik mekemeler men jumyspen qamtý ortalyqtarynyń jumys barysymen tanysyp, «Belsendi uzaq ómir súrý ortalyǵy» men Shymkent qalasynyń Jumyspen qamtý ortalyǵyna bardy.
