Berdibek Saparbaev: Dári baǵasyn kótermeńizder
AQTÓBE. QazAqparat - Aqtóbe oblysynyń ákimdigi men dárihanalar arasyndaǵy memorandým oryndalǵan joq. Dári baǵasy 200 teńgege deıin qymbattaǵan. Bul týraly Aqtóbe oblysy ákimniń baspasóz qyzmetine silteme jasap QazAqparat tilshisi habarlaıdy.
Aqtóbe oblysynyń ákimi Berdibek Saparbaev dárihana basshylarymen kezdesý ótkizdi. Sebebi, oblys ákimdigi, farmatsevtıkalyq qyzmetti qoldaý jáne damytý qaýymdastyǵy, medıtsınalyq jáne farmatsevtıkalyq qyzmetti baqylaý departamenti arasyndaǵy memorandým kelisimi oryndalmaı otyr. Kelisim boıynsha dáriniń 106 túri qymbattamaýy tıis edi. Tekserý nátıjesinde baǵa 5-200 teńge aralyǵynda óskeni anyqtaldy.
«Bul másele birinshi ret talqylanyp otyrǵan joq. Naqty tapsyrmalar berildi. Aqtóbelikterdiń, sonyń ishinde áleýmettik jeliler arqyly túsken shaǵymdarǵa qaraǵanda baǵanyń kóterilýi áli de ózekti másele bolyp tur. Bul - memorandýmnyń oryndalýyn jetkilikti qadaǵalamaýdyń nátıjesi. Memleket basshysy dári baǵasyn ósirýge jol bermeý jóninde aıtty, Úkimettiń tıisti tapsyrmasy da bar. Biz dári-dármek qunyn baqylaý jumysyn qaıta jańǵyrtyp, kúsheıtýimiz kerek. Baǵany qadaǵalaýǵa jurtshylyq pen depýtattardy tartýymyz qajet», - dedi oblys ákimi Berdibek Saparbaev.
Sonymen qatar, oblys turǵyndary dárihanalardaǵy dárilik zattardyń jetispeýshiligine jıi shaǵym aıtady. Aqtóbe oblysy ákimi baspasóz qyzmetiniń habarlaýynsha, Aqtóbe turǵyndary oksalın maıy sekildi keń taraǵan dárilerdi de tabý qıyn ekendigin jazǵan. Tapshylyq «tumaý maýsymynyń» bastalýyna baılanysty týyndaǵan.
«Osyndaı jaǵdaı jyldan jylǵa qaıtalanyp keledi. Erterek daıyndalýǵa bolady ǵoı. Jaǵdaıdy túzetý kerek. Saraptama júrgizip, dárilik zattardyń qańtar men aqpan aılaryna jetetin qoryn jasańyzdar. Dárige muqtaj jandardy, qarttardy, zeınetkerlerdi, balalardy oılańyzdar. Baǵany kótermeńizder»,- dedi Berdibek Saparbaev. 
