Berdibek Saparbaev tsıfrlandyrýdy engizýge qatysty jumystardy synǵa aldy
Ákimdikte ótken basqosýda aımaq basshysy saladaǵy jaýapty tulǵalarǵa taǵy da naqty tapsyrmalar júktedi. Atap aıtqanda, bilim berý salasynda jańa oqý jyly bastalǵanǵa deıin aqparattyq júıelerdi biriktirý boıynsha jumystardy aıaqtaý tapsyryldy. Ár mektepte polıtsııa bólimderi men jedel basqarý ortalyǵyna baılanystyrylǵan beınebaqylaý kameralary ornatylýy tıis. Sondaı-aq, áleýmet-eńbek salasynda elektrondyq qyzmet kórsetý úlesin 70 paıyzǵa deıin jetkizý, áleýmettik ID-kartany iske qosý mindetteri qoıyldy.
«El Prezıdenti naqty mindetterdi aıqyndap berdi. Úkimet olardy oryndaýǵa baǵyttalǵan sharalardy belgiledi. Biraq strategııalyq maqsattarǵa jetý jolynda kidiris baıqalýda. Tsıfrlandyrýdy júzege asyrýda bizdiń oblys respýblıka boıynsha artta qalǵandardyń qatarynan kórinip otyr. Biz bul týraly jyl basynan beri aıtyp kelemiz, biraq nátıje kórinbeıdi. Áli de sol qalpynda. Munyń bári jaýapty tulǵalar tarapynan tıisti baqylaý men talaptyń joqtyǵynyń saldary», - dep atap ótti Berdibek Saparbaev.
Taraz qalasy boıynsha memlekettik qyzmetterdi avtomattandyrý, «Ashyq ákimdik» front ofısin qurý qajet. Páter ıeleri men servıstik uıymdar arasyndaǵy ózara qarym-qatynasty jetildirip, kóshelerdi jaryqtandyrýdy basqarý júıesin retteı túsken lázim. Kólik salasynda avtobýstarda elektrondy bılettendirýdi engizý mindeti baıaǵysha ózekti másele kúıinde qalýda.
«Buǵan deıin ótken kezdesýde jaýapty tulǵalar alǵa qoıylǵan mindetterdiń aǵymdaǵy jartyjyldyqtyń aıaǵyna deıin oryndalatynyna sendirgen edi. Endi ol merzim qazan-qarasha aıyna aýysypty. Ol úshin sebep taýyp, koronavırýs, karantındi alǵa tartýda. Tsıfrlandyrý boıynsha jumystardy bir aıdan soń qaıta qaraımyz. Suranys qatań bolady. Bizge jaı syltaý, bos sózder emes, naqty nátıje kerek», - dedi oblys ákimi.