Berdibek Saparbaev bazar basshylaryna eskertý jasady
TARAZ. QazAqparat – Jambyl oblysynyń ákimi Berdibek Saparbaev bazar jáne saýda oryndarynyń basshylarymen kezdesti, dep habarlaıdy QazAqparat oblys ákimdiginiń resmı saıtyna silteme jasap.
Kezdesýdiń kún tártibinde pandemııa kezinde jumysty qaıta bastaý máselesi qaraldy
«Bizdiń oblys aýmaǵynda 40-tan astam bazar men saýda orny jumys isteıdi. Kópshiliginde mindetti sanıtarlyq, karantındik, órtke qarsy talaptar oryndalmaıdy. Keshe olardyń birqataryn aralap, soǵan kezekti ret kóz jetkizdim. Al eger órt bola qalsa she? Oqıǵa ornyna órtke qarsy qyzmet tehnıkasy qalaı jetedi? Barshańyzǵa belgili, arnaıy bekitilgen qaýipsizdik erejeleriniń saqtalmaýy ókinishti jaǵdaıǵa ákep soqtyrýy múmkin», - dedi oblys ákimi.
Oblystyq taýarlar men qyzmetterdiń sapasyn jáne qaýipsizdigin baqylaý departamentiniń basshysy Berik Jarqynbekov atap kórsetkendeı, bazarlardyń birde-biri arnaıy bekitilgen talaptarǵa sáıkes kelmeıdi. Ol adamdardyń maskasyz júretindigin, sanıtarlyq tazalaǵyshtardyń joqtyǵyn, araqashyqtyqtyń saqtalmaıtyndyǵyn alǵa tartty.
Berdibek Saparbaev jaýapty memlekettik organdarǵa talaptardy saqtamaı otyrǵandarǵa qatysty tıisti quziret sheńberinde shara qoldanyp, saýda oryndaryn jabýdy júktedi.
«Sizderdiń maqsattaryńyz – kóp aqsha tabý emes, adamdardyń qaýipsizdigi men densaýlyǵyn oılaý. Birneshe kúnniń ishinde kemshilikterdi túzep, bazarlardyń bekitilgen algorıtmge sáıkes ashylýyn qamtamasyz etińizder. Arnaıy monıtorıngtik toptar tekseretin bolady. Azamattardyń ómiri men densaýlyǵynyń qaýipsizdigin qamtamasyz etý – basty másele. Bazar ákimshiligi barlyq talaptardy oryndaǵanda ǵana saýda-sattyqqa tolyq múmkindik beriledi. Bizdiń aldymyzda ınfektsııanyń jyldam taralýyna jol bermeý, adamdardyń densaýlyǵyn barynsha qorǵaý mindeti tur. Biz olardyń ómirin táýekelge tige almaımyz», - dep túıindedi oblys ákimi.
