Berdibek Saparbaev Baızaq aýdany turǵyndarymen kezdesti
TARAZ. QazAqparat – Jambyl oblysynyń ákimi Berdibek Saparbaev Baızaq aýdanyna jumys sapary barysynda áleýmettik sala uıymdarynyń jumysymen tanysyp, sharýa qojalyqtary men ónerkásip kásiporyndaryn, shaǵyn jáne orta bıznes nysandaryn aralady. Sondaı-aq, jergilikti turǵyndarmen kezdesti, dep habarlaıdy QazAqparat Jambyl oblysy ákiminiń baspasóz qyzmetine silteme jasap.
Aıta keteıik, aýdandaǵy segiz bilim berý ordasynda oryn tapshylyǵy baıqalýda. Bul másele Býryl aýylyndaǵy orta mektepke de tán. Aýyldaǵy týý kórsetkishi men halyqtyń kóship kelý qarqyny joǵary. Osy oraıda eldi mekende 300 orynǵa arnalǵan úshinshi mektep salý josparlanýda.
Bul oraıda aýdannyń Taraz qalasyna jaqyn ornalasýy birqatar máselerdiń týyndaýyna sebep bolyp otyrǵandyǵy jasyryn emes. Solardyń biri – jeke turǵyn úı qurylysy úshin jer telimderiniń jetispeýshiligi. Jalpy aýdan boıynsha jer telimderin berý 2006 jyly bastalǵandyǵyn tilge tıek etken aýdan ákimi Nurjan Nurjigitov, aýdan ortalyǵy – Sarykemer aýylynda kópqabatty turǵyn úı massıviniń qurylysyn bastaý týraly usynysyn jetkizdi.
Óz kezeginde oblys ákimimen kezdesken býryldyqtar mektepti kúrdeli jóndeýden ótkizýdi ótinip, jol qozǵalysynyń joǵary qarqynyna, jol-kólik oqıǵasynyń artýyna, sport mektebiniń joqtyǵyna, aýyldaǵy egin jınaý tehnıkasynyń jetispeýshiligine qatysty shaǵymdaryn jetkizdi. Sondaı-aq, aýyldaǵy sharýalardyń basym bóliginiń ıeliginde bar-joǵy 5-10 gektardan jer bar. Olardyń tehnıka satyp alýǵa aınalym qarajatynyń joqtyǵyn aıtpasaq ta túsinikti. Degenmen, aýyldyqtar birlesip áreket etýge yńǵaı tanytpaýda.
«Usaq sharýa qojalyqtary qashan da sapaly tuqym, tehnıka, tyńaıtqysh satyp alý máselelerin bastan keship keledi. Osy oraıda birigip jumys isteýdiń mańyzdylyǵy zor. Bul tabysqa jetýdiń jalǵyz joly», - dedi B. Saparbaev.
Aýyldyqtarmen kezdesýde óńir basshysy mal dárigerlik pýnktiniń qurylysyn júrgizýge, mektep pen kóshelerdi jóndeýge kómektesýge ýáde berdi. Sonymen qatar, Úkimetke «Aýyl – el besigi» baǵdarlamasy aıasynda qatysýshylardyń sanyn arttyrý týraly usynys joldanǵanyn jetkizdi.
«Kolledj túlekteriniń kóbi jumyssyzdar qataryn tolyqtyrady. Osyǵan asa nazar aýdaryp otyrmyz. Endi olar tek jumys berýshilerdiń suranysy boıynsha mamandar daıarlaıtyn bolady», - dep atap ótti B. Saparbaev.
Al Sarykemer aýylynyń mádenıet úıinde ótken turǵyndarmen kezdesý barysynda aýdan ákimi óńirdiń áleýmettik-ekonomıkalyq ahýaly men aldaǵy josparlar týraly baıandady. Onda baızaqtyqtar jańa mektepter, ortalyq káriz, jeke turǵyn úı qurylysyna jer telimderin berý máselelerin kóterdi.
«Biz eń bastysy – qoǵamdaǵy beıbitshilik pen tynyshtyqty saqtaýymyz kerek. Sonda ǵana ekonomıka, aýyl sharýashylyq, basqa da salalarda tabysqa qol jetkizý bolady. Jerdi paıdalanýdyń tıimdiligin arttyrý, sharýa qojalyqtaryn irilendirý, shaǵyn jáne orta bıznesti damytý, aýyl turǵyndarynyń tabysyn arttyrýdyń pılottyq jobasyn jedel iske asyrý, bilim berý jáne densaýlyq saqtaý mekemeleriniń materıaldyq-tehnıkalyq bazasyn nyǵaıtý mindetterine aıryqsha basymdyq berý qajet. Atqaratyn jumys kóp. Biz tek birlesip áreket etkende ǵana oń nátıjege qol jetkizemiz», - dep túıindedi óz sózin Berdibek Saparbaev.
